விமான விபத்தைத் தவிர்த்த பெண்பைலட்டுக்கு பாராட்டு மழை!

June 11th, 2012 அன்று பிரசுரிக்கப்பட்டது.

ஏர் இந்தியாவிற்குச் சொந்தமான விமானம் ஒன்று நேற்று காலை அசாம் மாஎஇலத்தில் இருந்து கவுகாத்தி நோக்கிப் புறப்பட்டது.

அந்த விமானத்தில் விமானிகள் , பயணிகள் மற்றும் பணியாளர்கள் என்று மொத்தமாக 52 பேர் பயணித்தனர். அந்த விமானத்தை ஊர்மிளா யாதவ், யாஷு என்ற இரண்டு பெண் பைலட்டுகள் இயக்கினர். விமானம் வானில் கிளம்பிய உடனேயே விமானத்தில் இருந்து ஒரு பொருள் தரையில் விழுந்தது. விமான நிலைய தரைக்கட்டுப்பாட்டு அறையில் இருந்தவர்கள் இதை கவனித்தனர்.

விமான நிலைய ஊழியர்கள் அதன் அருகில் சென்று பார்த்தபோது விமானத்தின் முன்பக்கத்தில் இருக்கும் இரண்டு டயர்களில் ஒன்று கழன்று தரையில் விழுந்திருப்பது தெரிய வந்தது. அதற்குள் விமானம் கவுகாத்தியை நெருங்கிவிட்டது. டயர் கழன்றது குறித்து விமானிகளுக்கு தகவல் தெரிவிக்கப்பட்டது. இதையடுத்து விமானத்தை பத்திரமாக தரையிறக்கும் முயற்சியை விமானிகள் மேற்கொண்டனர்.

தரையிறங்கும்போது விமானம் தீப்பிடிக்காமல் இருக்க வேண்டும் என்பதற்காக, அதில் இருக்கும் எரிபொருள் தீரும் வரை விமானம் வானில் பலமுறை வட்டமிட்டது. விமான நிலையத்திலும் முன்எச்சரிக்கை நடவடிக்கைகள் மேற்கொள்ளப்பட்டன. விமானத்தை வழக்கமான முறையில் அதே நேரத்தில் சற்று மெதுவாக தரையிறக்கும்படி விமானிகளுக்கு அறிவுரை வழங்கப்பட்டது. அதன்படி விமானம் தரையிறக்கப்பட்டது.

முன்பக்கத்தில் ஒரு டயர் இல்லாமல் தரையிறங்கியதால், விமானம் பலமாக குலுங்கியது. இதில் விமானத்தில் இருந்த 52 பேருக்கும் லேசான காயங்கள் ஏற்பட்டது. அதிர்ஷ்டவசமாக பெரிய அளவில் அசம்பாவித சம்பவங்கள் ஏதும் நடைபெறவில்லை. விமானத்தை சாமர்த்தியமாக தரையிறக்கிய பெண் விமானிகள் ஊர்மிளா யாதவ், யாஷு இருவருக்கும் அசாம் முதல்-மந்திரி தருண் கோகாய் பாராட்டு தெரிவித்தார்.