ஜேர்மன் விமான விபத்தின் எதிரொலி: சுவிஸ் விமான நிறுவனம் அதிரடி அறிவிப்பு

ஜேர்மன் விமானம் விபத்துக்குள்ளானதை தொடர்ந்து, விமானிகளின் அறையில் இரண்டு விமானிகள் பயணம் முழுவதும் இருக்க வேண்டும் என சுவிஸ் சர்வதேச விமான நிறுவனம் அறிவித்துள்ளது.

ஜேர்மனியின் ‘ஜேர்மன் விங்ஸ் விமானம்’ கடந்த 24ம் திகதி பிரான்ஸ் நாட்டின் ஆல்ப்ஸ் மலையில் விபத்துக்குள்ளானது, இந்த விபத்தில் விமானத்தில் பயணம் செய்த 150 பேர் மரணமடைந்தனர்.

விமான விபத்திற்கு துணை விமானியே காரணம் என தற்போது தெரியவந்துள்ளதால், உலகம் முழுவதும் உள்ள விமான நிறுவனங்கள் விமானிகளுக்கான புதிய விதிமுறைகளை நடைமுறைப்படுத்தியுள்ளது.
ஜேர்மனியின் ‘லூஃப்தான்சா’ விமான நிறுவன குழுவின் ஒரு அங்கமான சுவிட்சர்லாந்து சர்வதேச விமான நிறுவனம் நேற்று அதிரடி விதிமுறைகளை அறிவித்துள்ளது.

’Cockpit’ எனப்படும் விமானிகளின் அறையில் இருக்கும் இரண்டு விமானிகளில் ஒருவர் வெளியே செல்ல நேரிட்டால், அவருக்கு பதிலாக மற்றொரு விமானி உள்ளே செல்ல வேண்டும், விமானம் பயணிக்கும் ஒட்டுமொத்த நேரங்களிலும் இரண்டு விமானிகள் அறையில் இருப்பது அவசியம் என தெரிவித்துள்ளது.
ஐரோப்பிய வான்வழி போக்குவரத்து பாதுகாப்பு நிறுவனம்(European Aviation Safety Agency (EASA)) வலியுறுத்திருந்த இந்த புதிய விதிமுறைகளை தற்போது சுவிட்சர்லாந்து அரசும் நடைமுறைப்படுத்தியுள்ளது.

சுவிட்சர்லாந்தை சேர்ந்த Helvetic Airways மற்றும் EasyJet Switzerland விமான நிறுவனங்கள் இந்த புதிய விதிமுறைகளை ஏற்கனவே வலியுறுத்தி நடைமுறைப்படுத்தியும் வருகிறது.

விமானிகள் புதிய விதிமுறைகளை பின்பற்றுவதுடன், அவர்கள் தினந்தோறும் மனநலம் சார்ந்த மருத்துவ பரிசோதனைகளை செய்துக்கொள்ள வேண்டும்.
மேலும் தனது சக விமானிகளிடம் உடல்நலம் அல்லது நடவடிக்கைகளில் ஏதாவது மாற்றம் அல்லது சந்தேகம் எழுந்தால், அதை உயர் அதிகாரிகளுக்கு தெரிவிக்க வேண்டும் என்றும் சுவிஸ் சர்வதேச விமான நிறுவனம் வலியுறுத்தியுள்ளது.
http://www.tamilan24.com/contents/?i=7524