கோரிக்கையை நிறைவேற்ற மொட்டை மாடியில் ஏறி தற்கொலை மிரட்டல் விடுத்த ஆந்திர எம்.எல்.ஏ.

by **யுவராஜா** Sun 25 Nov 2012 - 9:23

ஆந்திராவில், ஆர்.டி.ஓ., அலுவலக மொட்டை மாடியில் ஏறி, தற்கொலை செய்து கொள்ளப் போவதாக மிரட்டல் விடுத்து, தன் கோரிக்கையை சாதித்துக் கொண்டார் தெலுங்கு தேசம் கட்சி, எம்.எல்.ஏ., ஒருவர்.
ருசிகரமான இந்த சம்பவம் பற்றிய விபரம் வருமாறு:ஆந்திராவில், முதல்வர் கிரண்குமார் ரெட்டி தலைமையிலான, காங்கிரஸ் அரசு உள்ளது. இங்கு எதிர்க்கட்சியாக, சந்திரபாபு நாயுடுவின் தெலுங்கு தேசம் உள்ளது. இந்தக் கட்சியைச் சேர்ந்த,எம்.எல்.ஏ., ராமா ராவ். மேற்கு கோதாவரி மாவட்டம், கொவ்வூர் தனி தொகுதியிலிருந்து தேர்ந்தெடுக்கப்பட்டவர்.இவர் நேற்று முன் தினம், கொவ்வூரில் உள்ள கோட்டாட்சியர் அலுவலகமான, ஆர்.டி.ஓ., அலுவலக கட்டடத்தின் மீது திடீரென ஏறினார்.
மொட்டை மாடியில் நின்ற அவர், கீழே நிற்பவர்களைப் பார்த்து கூச்சல் போட்டார். அத்துடன் கோரிக்கை பட்டியல் ஒன்றையும் வாசித்தார். தன்கோரிக்கைகளை நிறைவேற்றவில்லை எனில், தற்கொலை செய்து கொள்ளப் போவதாக மிரட்டினார்.தொகுதிஎம்.எல்.ஏ., மொட்டை மாடி மீது நின்று, போராட்டம் நடத்தும் தகவல், கொவ்வூர் நகரம் முழுவதும் பரவியதால், ஆர்.டி.ஓ., அலுவலகம் முன், தெலுங்கு தேசம் கட்சித் தொண்டர்கள் மற்றும் பொதுமக்கள், நூற்றுக்கணக்கானோர் கூடினர்.
இதுபற்றிய தகவல், ஆர்.டி.ஓ.,வுக்கும் தெரிவிக்கப்பட்டது. வெளியூர் சென்றிருந்த ஆர்.டி.ஓ., சூர்யாராவ், தன் பயணத்தை ரத்து செய்து, அலுவலகம் வந்தார். மொட்டை மாடியில் இருந்த, எம்.எல்.ஏ., விடம்,"உங்களின் கோரிக்கை என்ன?' என்று கேட்டார்.அதற்கு எம்.எல்.ஏ., ராமா ராவ்,"ஆந்திர அரசு, ஏழைகள் மற்றும் மகளிர் சுய உதவி குழுவினருக்கு, "தீபம்' திட்டத்தின் கீழ், வழங்கும் சமையல் காஸ் இணைப்பை, என் தொகுதி மக்களுக்கும் வழங்க வேண்டும். "நீலம்' புயலால், பாதிக்கப்பட்ட விவசாயிகளுக்கு, உடனடியாக நிவாரணத் தொகை வழங்க வேண்டும்' என, கோரிக்கை விடுத்தார்.அதைக் கேட்ட, ஆர்.டி.ஓ., உடனடியாக, மாவட்டகலெக்டர் மற்றும் துணை கலெக்டரிடம் பேசினார்.
இதன்பின், " தீபம் திட்டத்தின் கீழ், கொவ்வூர் தொகுதிக்கு, 900 சமையல் காஸ் இணைப்பு வழங்கப்படும்' என, உறுதி அளித்தார்."உறுதி மொழியை கடிதம் மூலம் தர வேண்டும்' என, எம்.எல்.ஏ., கூறியதால், ஆர்.டி.ஓ., கடிதம் எழுதிக் கொடுத்தார். கடிதத்தை பெற்ற பின், எம்.எல்.ஏ., கீழே இறங்கி வந்தார்.""தலித் இனத்தை சேர்ந்தவர் என்பதாலும், எதிர்க்கட்சி ஏம்.எல்.ஏ., என்பதாலும், என்னை குறைவாகமதிப்பிட்டு, நான் விடுக்கும் கோரிக்கைகளை அதிகாரிகள் அலட்சியப்படுத்துகின்றனர்,'' என்று கூறிய ராமராவ், பொதுமக்களிடமிருந்து விடைபெற்று, காரில் ஏறிச் சென்றார்.