இலங்கை சாதனை! ஆஸி. அணி 74 ஓட்டங்களுடன் வீழ்ந்தது...

by **ansar hayath** Fri 18 Jan 2013 - 15:20

இலங்கை – அவுஸ்திரேலிய அணிகளுக்கு இடையிலான மூன்றாவது ஒருநாள் சர்வதேச போட்டியில் முதலில் துடுப்பெடுத்தாடிய அவுஸ்திரேலிய அணி இலங்கை அணி பந்து வீச்சாளர்களை எதிர்கொள்ள முடியாது திணறி 74 சகல விக்கெட்களையும் இழந்துள்ளது.

நாணயச் சுழற்சியில் வென்று முதலில் துடுப்பெடுத்தாடிய அவுஸ்திரேலிய அணி 26.4 ஓவர்களில் சகல விக்கெட்களையும் இழந்து 74 ஓட்டங்களை மாத்திரமே பெற்றுள்ளது.
ஒருநாள் போட்டியொன்றில் அவுஸ்திரேலிய அணி பெற்ற 3வது ஆகக்குறைந்த ஓட்ட எண்ணிக்கை இதுவென்பது குறிப்பிடத்தக்கது.

சமீபத்தில் கிரிக்கெட் உலகை ஆட்டிப்படை அவுஸ்திரேலிய அணியை குறைந்த ஓட்டங்களில் ஆட்டமிழக்கச் செய்த அணி என்ற பெருமையை இலங்கை பெற்றுள்ளது.

1977ம் ஆண்டு இங்கிலாந்து அணிக்கு எதிராகவும் அவுஸ்திரேலியா 70 ஓட்டங்களைப் பெற்று சகல விக்கெட்களையும் இழந்ததே அவுஸ்திரேலிய அணியின் ஆகக்குறைந்த ஒருநாள் போட்டி மொத்த ஒட்டமாக இருந்தது.

நியூசிலாந்து அணிக்கு எதிராக 1986ம் ஆண்டு அடலய்ட் மைதானத்தில் 26.3 ஓவர்களில் 70 ஓட்டங்களுக்கு சகல விக்கெட்களையும் இழந்ததும் அவுஸ்திரேலிய அணியின் இரண்டாவது ஆகக்குறைந்த ஒருநாள் போட்டி மொத்த ஒட்டமாக இருக்கின்றது.

இந்நிலையில் அவுஸ்திரேலிய அணியை 74 என்ற குறைந்த ஓட்டங்களுக்கு ஆட்டமிழக்கச் செய்து இலங்கை அணி புதிய சாதனை படைத்துள்ளது.

இலங்கை அணியின் பந்துவீச்சில் நுவான் குலசேகர 10 ஓவர்கள் பந்துவீசி இரண்டு ஓட்டமற்ற ஓவர்கள் அடங்களாக 22 ஓட்டங்களைக் கொடுத்து ஐந்து விக்கெட்களை வீழ்த்தினார் குலசேகர ஒருநாள் போட்டிகளில் ஐந்து விக்கெட்களை வீழ்த்திய முதல் சந்தர்ப்பம் இதுவாகும்.

லசித் மலிங்க 7 ஓவர்கள் பந்துவீசி இரண்டு ஓட்டமற்ற ஓவர்கள் அடங்களாக 14 ஓட்டங்களைக் கொடுத்து 3 விக்கெட்களை வீழ்த்தினார்.

துடுப்பாட்டத்தில் அவுஸ்திரேலிய அணி சார்பில் ஸ்டார்க் மற்றும் டொஹெட்டி ஆகியோர் மாத்திரமே இரட்டை இலக்க ஓட்டங்களைக் கடந்தனர். ஸ்டார்க் 22 ஓட்டங்களையும் டொஹெட்டி 15 ஓட்டங்களையும் பெற்றனர். ஏனைய அனைவரும் ஒற்றை இலக்க ஓட்டங்களுக்கு ஆட்டமிழந்தனர்.

பதிலுக்கு 75 என்ற வெற்றியிலக்கை நோக்கித் துடுப்பெடுத்தாடிய இலங்கை அணி 20 ஓவர்களில் 06 விக்கெட்களை இழந்து 75 ஓட்டங்களைப் எடுத்து வெற்றிபெற்றது. கௌசல் பெரேரா 22 ஓட்டங்களையும் தில்ஷான் 22 ஓட்டங்களையும் பெற்றனர்.

இதன்படி ஐந்து போட்டிகள் கொண்ட ஒருநாள் தொடரில் இலங்கை அணி இரண்டுக்கு ஒன்று என்ற கணக்கில் முன்னிலையில் உள்ளது.

இன்றைய போட்டியின் ஆட்ட நாயகனாக இலங்கை அணி பந்துவீச்சாளர் நுவான் குலசேகர தெரிவு செய்யப்பட்டார்.

இவ்விரு அணிகளுக்கும் இடையிலான நான்காது ஒருநாள் போட்டி 20ம் திகதி சிட்னியில் இடம்பெறவுள்ளது.