இனவாதம் தூண்டப்படாத வகையில் ‘ஹலால்’ விவகாரத்தில் அரசு நடவடிக்கை

இனவாதம் தூண்டப்படாத வகையில் ‘ஹலால்’ விவகாரத்தில் அரசு நடவடிக்கை
முஸ்லிம் அமைச்சர், எம்.பி.களுடன் பேச்சுவார்த்தை - அமைச்சர் கெஹெலிய
எம். எஸ். பாஹிம்
ஹலால் விவகாரம் தொடர்பில் அரசாங்கம் மெளனம் சாதிப்பதாக தெரிவிக்கப்படும் குற்றச்சாட்டை அரசாங்கம் நேற்று நிராகரித்தது. இந்த விடயத்தினூடாக நாட்டில் இனவாதம் தூண்டப்படுவதை தடுத்து நிறுத்துவதுடன் இந்தப் பிரச்சினையை தீர்க்க தேவையான நடவடிக்கைகளை அரசாங்கம் முன்னெடுத்துள்ளதாக அமைச்சரவை பேச்சாளர் அமைச்சர் கெஹெலிய ரம்புக்வெல்ல தெரிவித்தார்.

ஹலால் பிரச்சினை தொடர்பில் அமைச்சரவையில் ஆராயப்பட்டதாகக் கூறிய அவர், தொடர்ந்து முஸ்லிம் அமைச்சர்கள் மற்றும் எம்.பி.களுடன் பேச உள்ளதாகவும் குறிப்பிட்டார். அமைச்சரவை முடிவுகளை அறிவிக்கும் ஊடகவியலாளர் மாநாட்டில் ஹலால் பிரச்சினை குறித்து எழுப்பப்பட்ட கேள்விக்கு பதிலளித்த போதே அமைச்சர் இதனை குறிப்பிட்டார். அவர் மேலும் கூறியதாவது:

‘ஹலால்’ என்பது முஸ்லிம்களுடன் தொடர்புடைய விவகாரம். பொதுபல சேனாவுடனும் உலமா சபையுடனும் அரசாங்கம் பேசியுள்ளது. மேற்படி அமைப்புகளிடையேயும் பேச்சு நடைபெற்றுள்ளது. இனவாதம் எழாத வகையில் இந்தப் பிரச்சினையை தீர்க்க நடவடிக்கை எடுக்கப்பட்டு வருகிறது.

எஸ்.எல்.எஸ். இனால் தான் தரச்சான்றிதழ் வழங்க முடியும். உலகில் ஹலால் சான்றிதழ் வழங்கும் நடைமுறை காணப்படுகிறது. ஹலால் சான்றிதழ் வழங்குவதன் சட்டபூர்வ தன்மை தொடர்பில் பிரச்சினை எழுந்துள்ளது. இது குறித்தும் ஆராயப்படுகிறது. இந்தப் பிரச்சினையை தீர்ப்பது தொடர்பில் சகல தரப்பினருடனும் தொடர்ந்து அரசாங்கம் பேச்சு நடத்தும் என்றார்.

பொதுபல சேனாவுக்கு பாதுகாப்பு அமைச்சு நிதி உதவி வழங்குவதாக தெரிவிக்கப்படும் குற்றச்சாட்டையும் அவர் நிராகரித்தார்.