இளம் வீரர்கள் ஒத்துழைப்பு வழங்குவர் : ஏஞ்சலோ மெத்தியூஸ்...

இளம் வீரர்களின் ஒத்துழைப்புடன் எமது அணியை வெற்றிப் பாதைக்கு இட்டுச்செல்வோம் என இலங்கை அணியின் புதிய டெஸ்ட் தலைவரான ஏஞ்சலோ மெத்தியூஸ் தெரிவித்தார்.

இலங்கைக்கு கிரிக்கெட் சுற்றுப் பயணம் மேற்டிகொண்டுள்ள பங்களாதேஷ் அணி இரண்டு டெஸ்ட், மூன்று ஒருநாள் சர்வதேசப் போட்டி மற்றும் ஒரு இருபதுக்கு-20 போட்டிகளில் விளையாடவுள்ளது.



இந்நிலையில் கொழும்பு தாஜ் சமுத்திரா ஹோட்டலில் இன்று வியாழக்கிழமை மாலை இடம்பெற்ற ஊடகவியலாளர் சந்திப்பிலேயே ஏஞ்சலோ மெத்தியூஸ் மேற்கண்டவாறு குறிப்பிட்டார்.

இது குறித்து அவர் மேலும் தெரிவிக்கையில்,

இது எமக்கு சவால் சிறைந்த ஒரு போட்டித்தொடர். எமது அணி வீரர்கள் சிறந்த ஆட்டத் திறனுடன் உள்ளார்கள். எமது சிரேஷ்ட வீரர்கள் குறிப்பாக மஹேல ஜெயவர்தன போன்றோர் காயம் காரணமாக இப்போட்டிகளில் பங்கு பற்றாமை எமக்கு பாரிய பின்னடைவாக இருப்பினும் அணியில் இடம்பெற்றுள்ள புதிய இளம் வீரர்கள் தமது முழுத் திறனையும் வெளிப்படுத்தி ஒத்துழைப்புகளை வழங்குவார்கள்.

இதேவேளை, எமது அணி முழுத்திறனையும் வெளிப்படுத்தி பங்களாதேஷ் அணிக்கு எதிரான போட்டிகளில் சவாலை ஏற்படுத்தும் என இலங்கை அணித்தலைவர் மேலும் தெரிவித்தார்.

இதுதொடர் குறித்து பங்களாதேஷ் அணியின் தலைவர் முஸ்பிகுர் ரஹீம் தெரிவிக்கையில்,



இலங்கை அணி ஒரு பலம்வாய்ந்த அணியாகும். இருப்பினும் நாம் இறுதியாக மேற்கிந்தியத் தீவுகளுடன் இடம்பெற்ற போட்டிகளில் திறமையாக செயற்பட்டோம். அதேபோல் இத்தொடரிலும் எமது சிரேஷ்ட வீரர்கள் திறமையாக செயற்படுவார்கள் என எதிர்பார்க்கின்றேன்.

சகிப் அல் ஹஷன் இத் தொடரில் காயம் காரணமாக பங்குபற்றாமை எமது அணிக்கு பாரிய பின்னடைவாகும். இருப்பினும் அதனை எமது இளம் வீரர்கள் நிவர்த்திசெய்வார்கள். ஆனாலும் இது ஒரு சவால் நிறைந்த போட்டியாகவே அமையும் என அவர் மேலும் தெரிவித்தார்.