சென்னை விமான நிலையத்தில் தங்க கட்டி கடத்திய 2 பேர் கைது

by *சம்ஸ் Tue 2 Apr 2013 - 8:00

ஆலந்தூர், ஏப். 2-

இலங்கை தலைநகர் கொழும்புவில் இருந்து மீனம்பாக்கம் விமான நிலையத்துக்கு நேற்று நள்ளிரவு ஒரு விமானம் வந்தது

பொதுவாக இலங்கையில் இருந்து வரும் விமான பயணிகளை போலீசார் தீவிரமாக கண்காணிப்பது வழக்கம். வழக்கம்போல் நேற்று இரவும் இலங்கை விமானத்தில் வந்த பயணிகளை போலீசார் கண்காணித்தபடி இருந்தனர்.

இரண்டு பயணிகளை பார்த்ததும் போலீசாருக்கு சந்தேகம் ஏற்பட்டது அவர்களை அழைத்து பாஸ் போர்ட், விசா உள்ளிட்டவற்றை கேட்டு பல்வேறு கேள்விகள் கேட்டார்கள். ஆனால் எந்த கேள்விக்கும் அவர்கள் வாயை திறந்து பதில் பேசவில்லை.

ஒரு துண்டு சீட்டில் நாங்கள் மவுன விரதம். இன்று பேசமாட்டோம் என்று எழுதி கொடுத்தனர். அதன் பிறகுதான் போலீசாருக்கு அவர்கள் மீது மேலும் சந்தேகம் வலுத்தது.

இருவரையும் தனி அறைக்குள் அழைத்து சென்று போலீசார் வலுக்கட்டாயமாக வாயை திறந்தனர். அப்போது ஒருவரது வாயில் இருந்து 255 கிராம் எடையுள்ள தங்க பிஸ்கட்டும் இன்னொருவர் வாயில் இருந்து 200 கிராம் எடையுள்ள தங்க பிஸ்கட்டும் விழுந்தது. இதன் மதிப்பு ரூ. 13.5 லட்சம் ஆகும்.

இதையடுத்து இருவரையும் கைது செய்தனர். இருவரும் கண்டியைச் சேர்ந்தவர்கள். ஒருவரது பெயர் சாகுல்அமீது (53), இன்னொருவர் பெயர் முகமது இஷாத் (47). அவர்கள் சென்னையில் யாருக்காக தங்கம் கடத்தி வந்தார்கள் என்பது பற்றி விசாரித்து வருகிறார்கள்.