தங்கக் கட்டி கடத்திய இலங்கையர் இருவர் சென்னை விமான நிலையத்தில் கைது

தங்கக் கட்டி கடத்திய இலங்கையர் இருவர் சென்னை விமான நிலையத்தில் கைது
இலங்கை தலைநகர் கொழும்பில் இருந்து மீனம்பாக்கம் விமான நிலையத் துக்கு நேற்று முன்தினம் நள்ளிரவு ஒரு விமானம் வந்தது.

பொதுவாக இலங்கையில் இருந்து வரும் விமானப் பயணிகளை பொலிஸார் தீவிரமாக கண்காணிப்பது வழக்கம். வழமைபோல் நேற்று முன்தினம் இரவும் இலங்கை விமானத்தில் வந்த பயணிகளை பொலிஸார் கண்காணித்தபடி இருந்தனர்.

இரண்டு பயணிகளை பார்த்ததும் பொலிஸாருக்கு சந்தேகம் ஏற்பட்டது. அவர்களை அழைத்து கடவுச்சீட்டு விசா உள்ளிட்டவற்றை கேட்டு பல்வேறு கேள்விகளை கேட்டார்கள். ஆனால் எந்த கேள்விக்கும் அவர்கள் வாயை திறந்து பதில் பேசவில்லை. ஒரு துண்டு சீட்டில் நாங்கள் மவுன விரதம் இன்று பேசமாட் டோம் என்று எழுதிக் கொடுத்தனர். அதன் பிறகுதான் பொலிஸாருக்கு அவர்கள் மீது மேலும் சந்தேகம் வலுத்தது.

இருவரையும் தனி அறைக்குள் அழைத்து சென்று பொலிஸார் வலுக்கட்டாயமாக வாயை திறந்தனர். அப்போது ஒருவரது வாயில் இருந்து 255 கிராம் எடையுள்ள தங்கக் கட்டியும் இன்னொருவர் வாயில் இருந்து 200 கிராம் எடையுள்ள தங்கக் கட்டியும் விழுந்தது. இதன் மதிப்பு ரூ. 13.5 இலட்சம் ஆகும்.

இதையடுத்து இருவரையும் கைது செய்தனர். இருவரும் கண்டியைச் சேர்ந்தவர்கள். ஒருவரது பெயர் சாகுல் அமீது (53), இன்னொருவர் பெயர் முகமது இஷாத் (47) அவர்கள் சென்னையில் யாருக்காக தங்கம் கடத்தி வந்தார்கள் என்பது பற்றி விசாரித்து வருகிறார்கள்.