கோடியக்கரை மீனவர்கள் மீது சிங்கள கடற்படை மீண்டும் தாக்குதல்

by *சம்ஸ் Thu 11 Apr 2013 - 7:50

வேதாரண்யம், ஏப். 11-

தமிழக மீனவர்கள் மீது இலங்கை கடற் படையினர் தாக்குதல் நடத்துவது தொடர்கதையாக நடந்து வருகிறது. நாகை, ராமேஸ்வரம் மீனவர்கள் இலங்கை கடற்படையினரால் கடுமையாக பாதிக்கப்படுகிறார்கள். தமிழக மீனவர்கள் பிடித்து வைத்துள்ள மீன்களையும் சிங்களர்கள் பறித்து சென்றுவிடுவதால் தமிழக மீனவர்களின் வாழ்வாதாரம் பாதிக்கப்படுகிறது.

சமீபத்தில் மீன் பிடிக்க சென்ற காரைக்கால் மற்றும் ராமேஸ்வரம் மீனவர்களை இலங்கை கடற்படையினர் சிறை பிடித்து சென்றனர். அவர்கள் இலங்கையில் உள்ள சிறையில் அடைக்கப்பட்டுள்ளனர். அவர்கள் இன்னும் மீட்கப்படவில்லை. இந்த நிலையில் தற்போது மீண்டும் தமிழக மீனவர்கள் மீது தாக்குதல் சம்பவம் நடை பெற்றுள்ளது.

இது பற்றிய விவரம் வருமாறு:-

நாகை மாவட்டம் வேதாரண்யம் அருகே உள்ள வெள்ளப்பள்ளத்தை சேர்ந்தவர்கள் செல்வம், மாரியப்பன், விஜயகுமார், சவுந்திரராஜன். இவர்கள் 4 பேரும் நேற்று மதியம் படகில் கடலுக்கு மீன் பிடிக்க சென்றனர். கோடியக்கரைக்கு தென் கிழக்கு பகுதியில் அவர்கள் மீன் பிடித்து கொண்டிருந்தனர்.

அப்போது இலங்கை கடற்படையின் ரோந்து கப்பல் அங்கு வந்தது. அதில் இருந்த இலங்கை கடற்படை வீரர்கள் தமிழக மீனவர்கள் 4 பேர் மீதும் சரமாரி தாக்கினார்கள். சிலிப்பர் கட்டை, கயிற்றால் மீனவர்கள் செல்வம், மாரியப்பன், விஜயகுமார், சவுந்திர ராஜன் ஆகியோரை சரமாரி அடித்தனர். மேலும் மீனவர்கள் வைத்திருந்த ஐஸ் பெட்டியையும், மீன்களையும், வலைகளையும் எடுத்து கொண்டு அங்கிருந்து சென்று விட்டனர்.

தாக்குதலில் 4 மீனவர்களும் பலத்த காயம் அடைந்தனர். அவர்கள் தங்களது படகில் வெள்ளப்பள்ளம் திரும்பினார்கள். இது குறித்து உறவினர்களுக்கு தகவல் தெரிவிக்கப்பட்டது. அவர்கள் கடற்கரைக்கு வந்தனர்.

பின்னர் 108 ஆம்புலன்ஸ் வரவழைக்கப்பட்டு மீனவர்கள் 4 பேரும் நாகை அரசு ஆஸ்பத்திரிக்கு அனுப்பி வைக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.

இது குறித்து கடலோர காவல் படைக்கும், மீன் வளத்துறை அதிகாரிகளுக்கும் தகவல் தெரிவிக்கப்பட்டது. அதிகாரிகள் வந்து விசாரணை நடத்தி வருகிறார்கள். நாகை, வேதாரண்யம் பகுதி மீனவர்கள் மீது அடிக்கடி இலங்கை கடற்படையினர் தாக்குதல் நடத்தி வரும் சம்பவத்திற்கு முற்றுப்புள்ளி வைக்க மத்திய, மாநில அரசுகள் நடவடிக்கை எடுக்க வேண்டும் என மீன வர்கள் கோரிக்கை விடுத்துள்ளனர்.

மீனவர்கள் மீண்டும் தாக்கப்பட்ட சம்பவம் வேதாரண்யம், நாகை மீனவர்கள் மத்தியில் கொந்தளிப்பை ஏற்படுத்தி உள்ளது.