எங்கள் ஆட்சி அமைந்தால் கட்சிக்கு எதிராக செயல்படும் அதிகாரிகள் மீது கடும் நடவடிக்கை: மாயாவதி மிரட்டல்

by *சம்ஸ் Mon 15 Apr 2013 - 7:50

லக்னோ, ஏப். 15-

பகுஜன் சமாஜ் கட்சி சார்பில் டாக்டர் அம்பேத்காரின் 122-வது பிறந்ததின விழா கொண்டாடப்பட்டது. உத்தரபிரதேச மாநில தலைநகர் லக்னோ நகரில் நடந்த விழாவில் கட்சி தலைவரும், முன்னாள் முதல்-மந்திரியுமான மாயாவதி கலந்து கொண்டு பேசினார்.

அப்போது அவர் சமாஜ்வாடி கட்சி அரசை கடுமையாக விமர்சித்தார். விழாவில் அவர் பேசியதாவது:-

டாக்டர் அம்பேத்கார் பிறந்த தினவிழாவையட்டி சுமார் 3 கிலோ மீட்டர் தூரத்திற்கு அனுமதி பெற்று வைக்கப்பட்டிருந்த பேனர்கள் அகற்றப்பட்டுள்ளன. அம்பேத்காருக்கு லட்சக்கணக்கான மக்கள் அஞ்சலி செலுத்த வருவார்கள் என்று தெரிந்தும் வேண்டுமென்றே பேனர்கள் அகற்றப்பட்டு உள்ளது, கடும் கண்டனத்திற்கு உரியதாகும்.

சமாஜ்வாடி அரசு பழிவாங்கும் அரசியலில் ஈடுபடுகிறது. சமாஜ்வாடி அரசுக்கு ஆதரவான அதிகாரிகள் எங்கள் கட்சிக்கு எதிராக தொடர்ந்து செயல்பட்டு வருகின்றனர். அவர்கள் யார்-யார் என்று கண்காணித்து வருகிறோம். அடுத்து நாங்கள் ஆட்சிக்கு வரும்போது குறிப்பிட்ட அதிகாரிகள் மீது உறுதியாக நடவடிக்கை எடுக்கப்படும்.

எனது ஆட்சியின்போது ஏழை விவசாயிகளுக்கு அரசு நிலம் குறைந்த தொகைக்கு குத்தகைக்கு விடப்பட்டது. ஆனால் தற்போது சமாஜ்வாடி கட்சி நிர்வாகிகள் அந்த நிலங்களை அனுபவிக்கிறார்கள். மீண்டும் நாங்கள் ஆட்சிக்கு வரும்போது, அரசு நிலங்கள் மீட்கப்பட்டு நிரந்தரமாக ஏழை விவசாயிகளிடம் ஒப்படைக்கப்படும்.

எனது ஆட்சியின்போது எந்த காலகட்டத்திலும் மதவாத பிரச்சினைகள் உருவாக இடம் கொடுக்கவில்லை. அயோத்தி பிரச்சினை தொடர்பான வழக்கில் தீர்ப்பு வெளியானபோதுகூட அனைத்து மாநிலங்களிலும் பள்ளி, கல்லூரி, அலுவலகங்கள் மூடப்பட்டன. ஆனால் உத்தரபிரதேசத்தில் பள்ளி கல்லூரி மற்றும் அலுவலகங்கள் வழக்கம்போல் இயங்கின. மத்திய படைகள் திருப்பி அனுப்பப்பட்டன.

மாநில காவல் துறையை கொண்டே சட்டம்-ஒழுங்கு பராமரிக்கப்பட்டது. ஆனால் தற்போது ஒருவருட சமாஜ்வாடி ஆட்சி காலத்தில் நூற்றுக்கும் அதிகமான மத கலவரங்கள் நடந்துள்ளன. சில பெரிய நகரங்களில் ஊரடங்கு உத்தரவு அமல்படுத்தப்பட்டது.

தற்போது உத்தரபிரதேசத்தில் வளர்ச்சிப்பணிகள் நின்றுவிட்டன. ஊழல்கள் அதிகரித்து உள்ளது. கற்பழிப்பு குற்றங்கள் காரணமாக பெண்களுக்கு பாதுகாப்பு இல்லாத நிலை நீடிக்கிறது. இவை குறித்து சுப்ரீம் கோர்ட்டு அறிக்கை கேட்டு பெற வேண்டும்.

இவ்வாறு மாயாவதி கூறினார்.

மாலைமலர்