பாலக்காடு அருகே ரெயில் மோதி கோவை வாலிபர் உள்பட 2 பேர் பலி

by *சம்ஸ் Tue 16 Apr 2013 - 7:39

கொழிஞ்சாம்பாறை, ஏப்.16-

கேரள மாநிலம் ஆலப்புழையில் இருந்து நேற்றுக் காலை தன்பாத்துக்கு ரெயில் புறப்பட்டது. திருச்சூர் அருகே உள்ள அரூர் என்ற இடத்தில் வந்தது. அப்போது அதே பகுதியை சேர்ந்த ஜோசப் மகன் வர்க்கீஸ் (வயது32) ரெயில் தண்டவாளத்தின் நடுவே செல்போனில் பேசிக்கொண்டு சென்றார்.

எதிர்பாராதவிதமாக ரெயில் வர்க்கீஸ் மீது மோதியது. இதில் தூக்கி வீசப்பட்ட வர்க்கீஸ் உடல் சிதறி சம்பவ இடத்திலேயே பரிதாபமாக இறந்தார். இதுகுறித்து அரூர் போலீசார் வழக்குப்பதிவு செய்து விசாரணை நடத்தி வருகிறார்கள்.

மற்றொரு சம்பவம்

அதே ரெயில் பாலக்காடு அருகேயுள்ள மங்கரை என்ற இடத்தில் வந்தது. அப்போது 40 வயது மதிக்கத்தக்க ஆண் ஒருவர் தண்டவாளத்தின் அருகே நடந்து சென்றார். எதிர்பாராதவிதமாக ரெயில் என்ஜினின் ஓரமாக இருந்த இரும்பு கம்பி அவரை அலாக்காக தூக்கியது. அவரது அலறல் சத்தம் ரெயில் ஓட்டுனருக்கு கேட்கவில்லை.

அதற்குள் மின்கம்பம் மற்றும் ரெயில் தண்டவாளத்தில் அந்த வாலிபரின் தலைமோதியது. தலை முற்றிலும் சிதைந்து ரத்தம் சொட்ட சொட்ட ரெயில் என்ஜினின் கம்பியில் தொங்கியவாறு அவரது உடல் சென்றது.

இதைப்பார்த்து அதிர்ச்சியடைந்த அந்த பகுதி பொதுமக்கள் ரெயில் டிரைவருக்கு சைகை மூலம் தெரிவித்தனர். உடனே ரெயில் நிறுத்தப்பட்டது. உடனடியாக மங்கரை போலீசுக்கு தகவல் தெரிவிக்கப்பட்டது. முகம் சிதைந்த நிலையில் ரெயில் கம்பியில் சிக்கியவரை மீட்டனர்.

பாலக்காடு அரசு ஆஸ்பத்திரிக்கு பிரேத பரிசோதனைக்காக கொண்டு சென்றனர். போலீஸ் விசாரணையில் அவர் தமிழ்நாடு கோவைப் பகுதியை சேர்ந்தவராக இருக்கலாம் என தெரிவித்தனர்.

மாலைமலர்