ஊழல் புகார்களில் சிக்கிய இரு அமைச்சர்களும் பதவி விலக முடியாது

ஊழல் புகார்களில் சிக்கிய இரு அமைச்சர்களும் பதவி விலக முடியாது
மத்திய அரசு திட்டவட்டம்
ஊழல் புகார்களில் சிக்கிய மத்திய சட்ட அமைச்சர் அஸ்வனிகுமார் மற்றும் ரயில்வே அமைச்சர் பவன்குமார் பன்சல் ஆகிய இருவரும் பதவி விலக முடியாது என மத்திய அரசு திட்டவட்டமாக தெரிவித்துள்ளது. நேற்று முன்தினம் மாலை நடைபெற்ற காங்கிரஸ் உயர் மட்டக் குழு கூட்டத்திற்கு பின் இந்த முடிவு எடுக்கப்பட்டுள்ளது.

காங்கிரஸ் திட்டவட்டம் :

கடந்த 2 நாட்களில் 2வது முறையாக நேற்று மாலை காங்கிரஸ் உயர்மட்டக் குழு கூடி சர்ச்சைகளில் சிக்கிய மத்திய அமைச்சர்கள் பதவி விலகுவது குறித்து ஆலோசனை நடத்தியது. காங்கிரஸ் தலைவர் சோனியா தலைமையில் நடைபெற்ற கூட்டத்தில், எதிர்க் கட்சி அரசுக்கு அளித்து வரும் நெருக்கடிகள் குறித்து விவாதிக்கப்பட்டது.

கூட்டத்தில் நடத்தப்பட்ட ஆலோசனைக்கு பின் தற்போது பஞ்சலும் அஸ்வனி குமாரும் பதவியில் நீடிப்பார்கள் என காங்கிரஸ் அறிவித்தது. இது குறித்து செய்தியாளர்களிடம் பேசிய மத்திய அமைச்சர் மணிஷ் திவாரி,

ரயில்வே அமைச்சர் மீதான குற்றங்களுக்கு போதிய ஆதாரம் இல்லை எனவும், அவர் மீதான குற்றங்கள் குறித்து விசாரணை முடிவதற்கு முன் எந்த முடிவையும் எடுக்க முடியாது எனவும் தெரிவித்துள்ளார். சட்ட அமைச்சர் மீதான வழக்கும் கோர்ட்டில் உள்ளது எனவும், மே 8 ஆம் திகதி அது விசாரணைக்கு வரும் எனவும் திவாரி தெரிவித்துள்ளார்.

அமைச்சர்கள் மீதான புகார் :

பதவி உயர்வு அளிப்பதற்காக உறவினர் லஞ்சம் வாங்கியதில் ரயில்வே அமைச்சர் பவன்குமார் பன்சலுக்கு தொடர்பு இருப்பதாகவும், நிலக்கரி ஊழல் வழக்கில் சி. பி. ஐ. அறிக்கையை மாற்றியதாக மத்திய சட்ட அமைச்சர் அஸ்வினிகுமார் மீதும் புகார் எழுந்தது. இதனால் இரு அமைச்சர்களும் பதவி விலக எதிர்க் கட்சிகள் வலியுறுத்தி வந்தன.

இந்த விவகாரத்தில் ஜனாதிபதி தலையிட வேண்டும் எனவும், நிலக்கரி ஊழல் வழக்கில் சி. பி. ஐ. அறிக்கையை மாற்றிய விவகாரத்தில் பிரதமர் மன்மோகன் சிங்கிற்கும் தொடர்பு இருப்பதாகவும், அவரும் பதவி விலக வேண்டும் எனவும் பா. ஜ. வலியுறுத்தி வருகிறது. லோக்சபா தேர்தல் நெருங்கி வரும் நிலையில் மத்திய அமைச்சர்கள் மீது அடுத்தடுத்து ஊழல் புகார்கள் வெளிவந்து கொண்டுள்ளது குறிப்பிடத்தக்கது.

லாலுபிரசாத் ஆதரவு :

லஞ்ச சர்ச்சைகளில் சிக்கிய மத்திய ரயில்வே அமைச்சர் பன்சலுக்கு ராஷ்டிரிய ஜனதா தள கட்சி தலைவர் லாலு பிரசாத் ஆதரவு தெரிவித்துள்ளார். பன்சலின் உறவினர் தனது அதிகாரத்தை தவறாக பயன்படுத்தி உள்ளார் எனவும் இதற்கும் பன்சலுக்கும் எவ்வித தொடர்பும் இல்லை எனவும், பன்சல் நேர்மையான மனிதர் எனவும் லாலு தெரிவித்துள்ளார்.

மேலும் பன்சலுக்கு தெரியாமலேயே அவரது உறவினர் லஞ்சம் பெற்றிருப்பதாகவும் லாலு தெரிவித்துள்ளார். மேலும் பதவி உயர்விற்காக பன்சலின் உறவினர் விஜய் சிங்லாவிற்கு ரூ. 90 இலட்சம் லஞ்சமாக அளித்த மகேஷ்குமார் மீது லஞ்சம் வழக்கு பதிவு செய்ய வேண்டும் எனவும் லாலு கோரிக்கை விடுத்துள்ளார்.

தினகரன்.