சேது சமுத்திர திட்டத்தை அரசியல் காழ்ப்புணர்ச்சியால் தடுக்க முயற்சிப்பதா?

சேது சமுத்திர திட்டத்தை அரசியல் காழ்ப்புணர்ச்சியால் தடுக்க முயற்சிப்பதா?
அரசியல் காழ்ப்புணர்ச்சியால் சேது சமுத்திர திட்டத்தை தடுக்க முயலுவதை மக்கள் உணர்ந்து வருகிறார்கள் என்று கருணாநிதி கூறியுள்ளார்.

தி.மு.க. தலைவர் கருணாநிதி நேற்று முன்தினம் வெளியிட்ட அறிக்கை: சேது சமுத்திர திட்ட தொடக்க விழா 2005 இல் மதுரையில் நடந்தபோது முதலமைச்சராக இருந்த ஜெயலலிதா விடுத்த அறிக்கையில், சேது சமுத்திர திட்டம் நனவாவதை உறுதிப்படுத்துவதற்கு நான் முக்கிய காரணமாக இருந்திருக்கிறேன் என்று குறிப்பிட்டார். அப்படி சொல்லி அப்போது பெருமை தேடிக்கொண்டவர். தற்போது அதே திட்டம் கூடாது என்று உச்ச நீதிமன்றத்தை நாடிச் சென்றுள்ளார் என்பதுதான் வேடிக்கையான முரண்பாடு.

1998 இல் தேசிய சுற்றுச்சூழல் பொறியியல் நிறுவனத்திடம் ஜெயலலிதாவின் வலியுறுத்தல் காரணமாக அறிக்கை பெறப்பட்டதாக கூறியுள்ளார். அதற்குப் பிறகு நடந்ததை அவர் அறியவில்லை போலும். அப்போது தரப்பட்ட அறிக்கை போதுமானதாக இல்லை என்பதற்காக மீண்டும் ஒருமுறை அதே நிறுவனத்திடம் விவரமான அறிக்கையை தருமாறு தூத்துக்குடி துறைமுகக் கழகம் கேட்டுக்கொண்டு, விளக்கமான அறிக்கை பெறப்பட்டது.

2004 இல் இத்திட்டம் குறித்து வழக்கு வந்தபோது, தேசிய சுற்றுச்சூழல் பொறியியல் நிறுவனத்திடம் அவர்கள் அளித்த அறிக்கை விவரமான ஒன்றா என்று கேட்டபோது, அந்த நிறுவனம் திட்டவட்டமாக தாங்கள் முழுமையாக ஆய்வு நடத்திய பிறகுதான் அந்த விவரமான அறிக்கையைத் தாக்கல் செய்ததாக தெரிவித்திருக்கிறார்கள்.

இந்த உறுதியான விளக்கத்திலிருந்து இத்திட்டம் நன்றாக ஆய்வு நடத்தப்படாமல் நிறைவேற்ற முன் வந்திருப்பதாக ஜெயலலிதாவின் கூற்று எந்த அளவுக்கு உண்மைக்கு முற்றிலும் புறம்பானது என்பது தெளிவாகிறது.

சேது சமுத்திரத்திட்டம் கூடாது என்று ஓ. பெர்னாண்டஸ் என்பவர் தொடுத்த வழக்கில் 2004 இல் சென்னை உயர் நீதிமன்ற தலைமை நீதிபதி மார்க்கண்டேய கட்ஜூ மற்றும் நீதிபதி வி. பாலசுப்பிரமணியம் அளித்த தீர்ப்பில் முக்கிய பகுதி, தேசிய நலனுக்காகக் கொண்டு வரப்படும் சேது சமுத்திரத் திட்டத்தை தடை செய்யும் நோக்கத்துடன் மனுதாரர் இந்த நீதிமன்றத்திற்கு விரைந்து வந்து வழக்கைத் தொடர்ந்துள்ளார். இத்திட்டம் நாட்டிற்கு மிகுந்த நற்பலனை கொடுக்கக்கூடியது என்பது எல்லோருக்கும் தெரிந்த ஒன்று. ஏனென்றால் தற்போது கப்பல்கள் ஸ்ரீலங்கா நாட்டைச் சுற்றி வங்காள விரிகுடா கடலுக்கு வரவேண்டியுள்ளது. பாக்ஜல சந்தியில் குறுக்காக கப்பல் கால்வாய் அமைத்தால் பெருமளவு பணமும், நேரமும் சேமிக்கப்பட ஏதுவாகும்.

தினகரன்.

எனக்கும் தோன்று கிறது அரசியல் காழ்புணர்ச்சி காரணமாகவே இந்த திட்டத்தை தடுக்க முயல்கிறார்கள் என்று