கொடைக்கானல் மலர் கண்காட்சி நாளை தொடக்கம்

திண்டுக்கல், மே.18

திண்டுக்கல் மாவட்டத்தில் மலைகளின் இளவரசியாக திகழும் கொடைக்கானல் சிறந்த சுற்றுலாதல மாகும். இங்கு ஆண்டுதோறும் கோடை விழாவையொட்டி மலர் கண்காட்சி நடத்தப்படும். அதன்படி இந்த ஆண்டு தமிழக சுற்றுலாத் துறை மற்றும் தோட்டக்கலைத் துறை சார்பில் கோடை விழா மற்றும் மலர் கண்காட்சி நாளை (ஞாயிற்றுக்கிழமை) தொடங்குகிறது.

இந்த கோடைவிழா வருகிற 28ந் தேதி வரை நடக்கிறது. கோடை விழா மற்றும் மலர் கண்காட்சி தொடக்க விழா கொடைக்கானல் பிரையண்ட் பூங்காவில் நாளை காலை 11 மணிக்கு நடக்கிறது. விழா விற்கு மாவட்ட கலெக்டர் வெங்கடாசலம் தலைமை தாங்குகிறார். என்.எஸ்.வி. சித்தன் எம்.பி., கே.எஸ்.என். வேணுகோபாலு எம்.எல்.ஏ., கொடைக்கானல் நகரசபை தலைவர் வி.எஸ். கோவிந்தன் ஆகியோர் முன்னிலை வகிக்கின்றனர்.

கோடை விழாவை நிதி அமைச்சர் ஓ.பன்னீர் செல்வம் தொடங்கி வைத்து பேசுகிறார். கொடைக்கானல் ஏரியின் 150வது ஆண்டு விழாவை மின்சாரம், மதுவிலக்கு மற்றும் ஆயத்தீர்வைத்துறை அமைச்சர் நத்தம் ஆர்.விசுவநாதன் குத்துவிளக்கேற்றி தொடங்கி வைத்து பேசுகிறார். மலர்கண்காட்சியை வேளாண்மைத்துறை அமைச்சர் எஸ். தாமோதரன் தொடங்கி வைத்து பேசுகிறார்.

கலை நிகழ்ச்சிகளை சுற்றுலாத்துறை அமைச்சர் பூ.செந்தூர் பாண்டியன் தொடங்கி வைத்து பேசுகிறார். முன்னதாக கொடைக்கானல் சுற்றுலா அலுவலர் குணசேகரன் வரவேற்கிறார். தோட்டக் கலைத்துறை துணை இயக்குனர் ராஜா முகமது திட்ட விளக்க உரையாற்றுகிறார்.

விழாவில் எம்.பி.க்கள், எம்.எல்.ஏ.க்கள் மற்றும் உள்ளாட்சி அமைப்புகளின் பிரதிநிதிகள், அரசு அலுவலர்கள், சுற்றுலா பயணிகள் உள்பட பலர் கலந்துகொள்கின்றனர். மலர் கண்காட்சி குறித்து கொடைக்கானல் தோட்டக் கலை துணை இயக்குனர் ராஜா முகமது வெளியிட்டுள்ள செய்திக் குறிப்பில் கூறியிருப்பதாவது:-

இந்த ஆண்டு தேசியக்கொடி நிறங்களை கொண்ட மலர்களால் புதிதாக மலர்படுகைகள், நட்சத்திர வடிவில் மலர்படுகை மற்றும் வானவில் நிறங்களை கொண்ட மலர்படுகை சிறப்பாக அமைக்கப்பட்டு உள்ளன. கறுஞ்சிவப்பு நிறத்தில் உள்ள டேலியா மலர் நாற்றுகள் இடம் பெறுகின்றன. இந்த மலர் கண்காட்சியில் ஏறத்தாழ 2 ஆயிரத்திற்கும் மேற்பட்ட தொட்டிகளில் மலர் செடிகள் நடவு செய்யப்பட்டு உள்ளன.

இவ்வாறு அவர் அதில் கூறி உள்ளார்.

கோடை விழாவையொட்டி சுற்றுலா பயணிகள் வருகை அதிகரித்து உள்ளது. தினமும் ஆயிரக்கணக் கானோர் கொடைக்கானலில் குவிந்த வண்ணம் உள்ளனர். மிகவும் பிரசித்தி பெற்ற கொடைக்கானல் மலர் கண்காட்சியை காண சுற்றுலா பயணிகள் ஆர்வமுடன் உள்ளனர்.