இந்தியா-சீனா உறவை வலுப்படுத்தப்போகும் 8 ஒப்பந்தங்கள்!

by **Muthumohamed** Thu 23 May 2013 - 22:13

ஆசியாவிலேயே மிகப்பெரிய நாடுகள் இந்தியாவும், சீனாவும்தான். உலகில் அதிகமக்கள்தொகை கொண்ட நாடுகளும் இந்த இரு நாடுகள்தான். இந்தியா, சீனாவின் முன்னேற்றம்தான்ஆசியாவின் முன்னேற்றம். ஏன், உலகத்தின் முன்னேற்றத்திற்கே ஒரு அடிப்படையாக கருதப்படுகிறது. எப்படி அடுத்தடுத்த வீடுகளில் சுமுக உறவு இருந்தால்தான் நன்றாக இருக்குமோ, அதுபோலத்தான் இந்தியாவுக்கும், சீனாவுக்கும் இடையே உறவுகள் சுமுகமாக இருக்கவேண்டும் என்பதுதான், எல்லா தலைவர்களின் எதிர்பார்ப்பும் ஆகும். உலகிலேயே மிக பழமையான கலாசாரத்திற்கும், நாகரீகத்திற்கும் உரித்தான நாடுகள், இந்த இரு நாடுகள்தான். இந்த இரு நாடுகளுக்கும் இடையே கி.மு.145-லேயே கலாசார, வர்த்தக உறவுகள் இருந்திருக்கின்றன. சீனாவில் உள்ள மிகப்பெரிய வரலாற்று ஆய்வாளர் சிமாகியான் இந்த காலக்கட்டத்தில் வாழ்ந்தவர். அவர் எழுதிய வரலாற்று சான்றுகளில், இந்தியாவில் இருந்து பொருட்கள் சீனாவுக்கு வியாபாரிகளால் வாங்கிச்செல்லப்பட்டதும்,அங்கிருந்து இந்தியாவுக்கு பொருட்கள் வந்ததும் குறிப்பிடப்பட்டுள்ளது. 6-ம் நூற்றாண்டுகளில் இந்த வர்த்தகம் மிகவும் மேம்பட்டு மகாபலிபுரம், நாகப்பட்டினம், கொச்சி, கொற்கை போன்ற துறைமுகங்களில் வர்த்தக தொடர்புகள் இருந்திருப்பது கண்டுபிடிக்கப்பட்டுள்ளது.

காஞ்சீபுரத்தில் இருந்து போதிதர்மர் சீனாவுக்கு 6-ம் நூற்றாண்டில் புத்த மதத்தை கொண்டு சென்றதும், அங்குள்ளவர்களுக்கு தற்காப்பு கலைகளை கற்றுக்கொடுத்ததும் அசைக்க முடியாத சான்றுகளாக விளங்குகின்றன.அதேபோல பல புத்தமத துறவிகள் அந்த காலத்திலேயே இந்தியாவுக்கு, குறிப்பாக தமிழ்நாட்டிற்கு வந்திருக்கிறார்கள். யுவான் சுவாங் என்ற யாத்ரீகர், இந்தியாவில் பலஇடங்களுக்கு சுற்றுப்பயணம் மேற்கொண்டிருக்கிறார். இப்படி மிக ஒற்றுமையோடு இருந்த உறவில், 1962-ம் ஆண்டு நடந்த போருக்கு பிறகு சற்று விரிசல் ஏற்பட்டது. நீரடித்து நீர்விலகாது என்பார்கள். அதுபோல கொஞ்சம் கொஞ்சமாக மீண்டும் உறவுகள் மேம்பட்டன.
கடந்த சில நாட்களுக்கு முன்பு லடாக் பகுதியில் சீன ராணுவம் ஊடுருவிய நேரத்தில், எங்கே அண்ணன் - தம்பிகளுக்குள் மீண்டும் சண்டை வந்துவிடுமோ? என்ற அச்சம், இந்தி-சீனி பாய் பாய், அதாவது இந்தியாவும், சீனாவும் சகோதரர்கள் என்ற உணர்வில் இருந்த இருநாட்டு மக்களுக்கும் ஏற்பட்டது. நல்லவேளையாக தனது படைகளை சீனா பின்வாங்கிக்கொண்டது. இந்தநிலையில், புதிதாக சீன பிரதமராக தேர்ந்தெடுக்கப்பட்ட லீ கெகியாங், தனது முதல் வெளிநாட்டு பயணமாக இந்தியாவுக்கு அன்பொழுக வந்தார். இந்தியாவும் இருகரம் நீட்டி வரவேற்றது.இரு பிரதமர்களுக்கு இடையே மிக பயனுள்ள பேச்சுவார்த்தை நடந்தது. அதில் ஒன்று பிரம்மபுத்திரா நதி. இந்த நதி சீனாவில் இருந்து இந்தியாவுக்குள் பாய்கிறது. இதன் குறுக்கே அணை கட்டவேண்டும் என்று சீனா எண்ணியது. இந்த பேச்சுவார்த்தையின்போது, இதுபோல இருநாட்டு எல்லைகளை தாண்டி ஓடிவரும் நதிகள் நம்மை ஒன்று சேர்க்கவேண்டுமே தவிர, பிரிக்கக்கூடாது என்று பேசியது, இந்தியா-சீனா உறவுக்கு மட்டுமல்லாமல், மாநிலங்களுக்கு இடையேயும்நதிநீர் பங்கீடுகள் தொடர்பாக எந்த விரிசலும் வந்துவிடக்கூடாது என்பதை பாடமாக காட்டியுள்ளது.

இந்த பேச்சுவார்த்தையில்,நிச்சயமாக இருநாட்டு உறவையும் வலுப்படுத்தும் ஒப்பந்தங்கள் இருக்கும் என்று எல்லோரும் எதிர்பார்த்தது வீணாய் போய்விடாமல், அப்படியே கையெழுத்திடப்பட்ட 8 ஒப்பந்தங்கள் அதை உறுதி செய்துள்ளது. இனி நிச்சயமாக, இரு நாடுகளுக்கு இடையேயுள்ள உறவில் சுவர் இருக்காது, பாலம் இருக்கும். தென்னாட்டு மக்களுக்கு ஒரு குறை இருக்கிறது. வெளிநாடுகளில் இருந்து இதுபோல பெரிய தலைவர்கள் வரும்போது, வடநாட்டை மட்டும் காட்டி அனுப்பிவிடுகிறார்கள். தென் மாநிலங்களுக்கு கூட்டிக்கொண்டு வருவதில்லை. சரித்திர காலம் தொட்டு தமிழ்நாடு, கேரளாவோடு தொடர்புள்ள சீன நாட்டு பிரதமரை, தெற்கே கூட்டிக்கொண்டு வந்திருந்தால், பழைய சரித்திர நினைவலைகள் திரும்பியிருக்கும். அந்த அடிக்கல்மீதே உறவு மாளிகையை எழிலுற கட்டியிருக்கலாம்.
-
தினந்தந்தி

by **rammalar** Fri 24 May 2013 - 17:27

1962 ம் ஆண்டு ஆக்ரமித்த பகுதிகளை விட்டு
சீனா வெளியேறி விட்டதா..?
-
அல்லது தாரை வார்த்து விட்டோமா..?
-
தெரிந்தவர்கள் சொல்லுங்கள்

இந்தியா-சீனா உறவை வலுப்படுத்தப்போகும் 8 ஒப்பந்தங்கள்!

இந்தியா-சீனா உறவை வலுப்படுத்தப்போகும் 8 ஒப்பந்தங்கள்!

Re: இந்தியா-சீனா உறவை வலுப்படுத்தப்போகும் 8 ஒப்பந்தங்கள்!