2022 உலகக் கோப்பை கால்பந்து: இந்திய அணி தகுதிபெறும்

2022-ல் கத்தாரில் நடைபெறவுள்ள உலகக் கோப்பை கால்பந்து போட்டியின் பிரதான சுற்றில் விளையாட இந்திய அணி தகுதி பெறும் என்று மாஸ்டர் பேட்ஸ்மேன் சச்சின் டெண்டுல்கர் தெரிவித்தார்.

நவி மும்பையில் செவ்வாய்க்கிழமை நடைபெற்ற 15 வயதுக்குட்பட்டோருக்கான தேசிய ஜூனியர் கால்பந்து போட்டியின் பரிசளிப்பு விழாவில் கலந்துகொண்ட சச்சின் மேலும் கூறியது:

2022-ம் ஆண்டு இந்திய கால்பந்து விளையாட்டில் மிகப்பெரிய விஷயங்கள் நடக்கும் என்பது எனக்கு தெரியும். அந்த ஆண்டு நடைபெறும் உலகக் கோப்பையில் விளையாட இந்திய அணி தகுதிபெறும் என்று நம்புகிறேன். அந்த போட்டிக்காக நீங்களே உங்களுக்கு இலக்கு நிர்ணயித்துக் கொள்ளுங்கள். மூத்த வீரர்கள் உங்களுக்கு வழிகாட்டுவார்கள். அவர்களை பின்பற்றி உங்கள் கனவை நனவாக்குங்கள்.

நான் உங்களுக்கு சிறிய அறிவுரை சொல்கிறேன். கால்பந்து விளையாட்டின் மீது மிகுந்த ஆர்வத்தோடு இருங்கள். விளையாட்டின் மீது தீராத காதல் கொண்டுவிட்டால், அது உங்களை கடுமையாக உழைக்க தூண்டும். கனவை உங்களுக்குள் வைத்துக் கொண்டு அதை துரத்துங்கள். அது ஒருநாள் நனவாகும்.

ஆர்வம் இருந்ததாலேயே எல்லா விஷயங்களிலும் என்னால் சாதிக்க முடிந்தது. நான் கிரிக்கெட்டின் மீது அதீத ஆர்வம் கொண்டிருந்தேன். அது இப்போதும் எனக்கு இருக்கிறது. ரசிகர்களின் ஆதரவும், அன்பும் எனக்கு மிகப்பெரிய பலமாகும். அதுதான் நான் சிறப்பாக செயல்பட உதவியது. கடந்த 23 ஆண்டுகளாக எனக்கு ஆதரவளித்து வரும் அனைத்து ரசிகர்களுக்கும் நன்றி தெரிவித்துக் கொள்கிறேன். இந்த கால்பந்து போட்டியின் இறுதி ஆட்டத்தில் தோல்வி கண்ட ஒடிசா அணியினர் நம்பிக்கையை இழந்துவிடக்கூடாது என்றார்.

இந்திய கால்பந்து அணியின் கேப்டன் சுனில் சேத்ரி பேசுகையில், "சரியான பயிற்சியும், உள்கட்டமைப்பு வசதிகளும் இருந்தால், நாமும் உலகத்தரம் வாய்ந்த கால்பந்து வீரர்களை உருவாக்க முடியும். கால்பந்து போட்டியை மேம்படுத்த தற்போது மேற்கொள்ளப்படும் இதுபோன்ற முயற்சியால் சர்வதேச கால்பந்து போட்டிகளில் விளையாடும் வாய்ப்பை இந்தியா பெறும் என நம்புகிறேன்' என்றார்.

தினமணி.