உலக கோப்பை கால்பந்து: கேமரூனை மெக்சிகோ 1-0 என்ற கோல் கணக்கில் வீழ்த்தியது

by **Naseeb Mohammed** Fri 13 Jun 2014 - 22:47

இந்த ஆண்டிற்கான உலக கோப்பை கால்பந்து போட்டியின் இரண்டாவது ஆட்டம் இன்று நடைபெற்றது. அதில் மெக்சிகோ மற்றும் கேமரூன் அணிகள் மோதின.

உலக கால்பந்து தரவரிசைப்பட்டியலில் 28வது இடத்தில் உள்ள மெக்சிகோவும், 58வது இடத்தில் உள்ள கேமரூனும் ஆரம்பம் முதலே மழை பெய்து கொண்டிருந்தபோதும் விறுவிறுப்பாக ஆடின. ஆட்டம் தொடங்கிய ஐந்தாவது நிமிடத்தில் மெக்சிகோவின் பால் அகுய்லர் அடித்த பந்து கேமரூனின் கோல் போஸ்டுக்கு மேலே சென்றது. அதே சமயம் ஆட்டம் தொடங்கிய பதிமூன்றாவது நிமிடத்தில் மெக்சிகோவின் டோஸ் சாண்டோஸ் அடித்த பந்து கோல் போஸ்டுக்குள் சென்ற போதும் பவுல் என அறிவிக்கப்பட்டது.

ஆட்டத்தின் முப்பத்தி ஒன்றாவது நிமிடத்தில் மீண்டும் டோஸ் சாண்டோஸ் அடித்த கோல் ஆப் சைடு என அறிவிக்கப்பட்டது. ஆனால் தொலைக்காட்சி ரீப்ளேயில் பார்த்த போது அது ஆப் சைடு போல் தெரியவில்லை. இதனால் ஆத்திரமடைந்த மெக்சிகோ கோச் மிகுவெல் ஹெரேரா அதிகாரிகளுடன் வாக்குவாதத்தில் ஈடுபட்டார்.

முதல் பாதி ஆட்டம் முடிந்த போது இரு அணிகளும் கோல் ஏதும் அடிக்காமல் சம நிலையில் இருந்தன. பின்னர் இரண்டாவது பாதி ஆட்டம் தொடங்கிய போது கேமரூன் அணியில் செட்ரிக்கிற்கு பதிலாக டேனி உள்ளே வந்தார். இரு அணிகளும் மீண்டும் ஆக்ரோஷத்துடன் விளையாடத் துவங்கின. ஆட்டம் தொடங்கிய 61வது நிமிடத்தில் மெக்சிகோ வீரர் பெரெல்டா அடித்த பந்து கோல் ஆனது. இதனால் மெக்சிகோ 1-0 என்று முன்னிலை பெற்றது.

பின்னர் 75வது நிமிடத்தில் கோல் அடித்த பெரெல்டா வெளியேற அவருக்கு பதிலாக ஜேவியர் களமிறங்கினார். ஆட்டக்களத்தை விட்டு வெளியேறிய பெரெல்டாவை வாழ்த்தி மிகப்பெரிய ஆரவாரக் குரல்கள் எழுந்தன. ஆட்டத்தின் 77வது நிமிடத்தில் மெக்சிகோ அணியின் மார்கோவுடன் கேமருன் அணியின் டேனி சவால் விட்டு பேசியதால் அவருக்கு மஞ்சள் அட்டை காண்பிக்கப்பட்டது. ஆட்டத்தின் 77 நிமிடத்தில் தாக்குதல் ஆட்டத்தை நடத்த திட்டமிட்ட கேமரூன் சாங்கிற்கு பதிலாக வெபோவை களமிறக்கியது. ஆட்டத்தின் 80வது நிமிடத்தில் மெக்சிகோ வீரர் ஹெர்ணான்டஸ் அடித்த பந்தை அற்புதமாக பிடித்தார் கேமரூன் அணியின் கோல் கீப்பர். இறுதி வரை கேமரூனால் எவ்வித கோலையும் அடிக்க முடியவில்லை. முடிவில் 1-0 என்ற கணக்கில் மெக்சிகோ வெற்றி பெற்றது. ஆட்ட நாயனாக மெக்சிகோவின் டோஸ் சாண்டோஸ் அறிவிக்கப்பட்டார்.