ஆதார்’ அட்டைக்கு புகைப்படம் எடுக்க உடை கட்டுப்பாடா? அரசு விளக்கம்

by *சம்ஸ் Sat 1 Jun 2013 - 6:59

புதுடெல்லி, ஜுன் 1-

ஆதார் அட்டைக்கு புகைப்படம் எடுக்க உடை கட்டுப்பாடு விதிக்கப்பட்டுள்ளதாக வதந்திகள் பரவி வருகின்றன.

இதனையடுத்து, இந்திய தனிநபர் அடையாள ஆணையம் (யூ.ஐ.டி.ஏ.ஐ.) அறிக்கை வெளியிட்டுள்ளது.

அந்த அறிக்கையில் கூறப்பட்டுள்ளதாவது:-

ஆதார் அட்டைக்காக புகைப்படம் எடுக்கும் நபர்களுக்கு உடை கட்டுப்பாடு விதிக்கப்பட்டுள்ளதாக சில ஊடகங்களில் செய்தி வெளியாகியுள்ளது. இதுபோன்ற கட்டுப்பாடுகள் ஏதும் விதிக்கப்படவில்லை என நாங்கள் தெளிவுப்படுத்த விரும்புகிறோம்.

நெற்றியில் இருந்து நாடி வரை முகத்தை மறைக்காதபடி எவ்வகை உடையையும் அணிந்து ஆதார் அட்டைக்கான புகைப்படத்தை பொதுமக்கள் எடுத்துக் கொள்ளலாம்.

முகம் முழுமையாக பதிவாக வேண்டும் என்பதைக் தவிர எவ்வித கட்டுப்பாடும் பொதுமக்களுக்கு விதிக்கப்படவில்லை.

தலைப்பாகை மற்றும் புர்கா போன்றவற்றோடு புகைப்படம் எடுக்கவும் அனுமதி உண்டு.

ஆதார் அட்டைக்கு புகைப்படம் எடுக்கும் ஊழியர்கள் தேவையற்ற வகையில் உடை கட்டுப்பாடு பற்றி வற்புறுத்துவது தொடர்பாக சம்பந்தப்பட்ட உயரதிகாரிகளுக்கு தகவல் அளித்தால் தக்க நடவடிக்கை எடுக்கப்படும்.

இவ்வாறு அந்த அறிக்கையில் கூறப்பட்டுள்ளது.