தென்மேற்கு பருவமழை தீவிரம்: கேரளாவில் பலத்த மழையால் சாலைகளில் வெள்ளம்

திருவனந்தபுரம், ஜூன். 3-

கேரளாவில் வானிலை ஆய்வு மையம் அறிவித்தப்படி கடந்த 1-ந்தேதி தென்மேற்கு பருவமழை தொடங்கியது. பாறசாலை முதல் காசர் கோடு வரை மாநிலத்தின் அனைத்து பகுதிகளிலும் பலத்த மழை பெய்கிறது.

அதிகபட்சமாக கண்ணூரில் 28.91 செ.மீ. மழை பெய்தது. கொடுங்கல்லூரில் 8 செ.மீ., பொன்னானி, வைக்கம் 7 செ.மீ., சேர்தலா 6, சாலக்குடி, மாவேலிக்கரா 5, திருவனந்தபுரம் 2 என்ற அளவுக்கு மழை பதிவாகி உள்ளது. இன்னும் 24 மணி நேரத்திற்கு மாநிலத்தின் அனைத்து பகுதிகளிலும் பரவலாக பலத்த மழை பெய்யும் என்று வானிலை ஆய்வு மையம் எச்சரித்துள்ளது.

கடந்த 3 நாட்களாக பெய்து வரும் கனமழை காரணமாக கேரளாவின் பெரும்பாலான பகுதிகளில் உள்ள சாலைகளில் வெள்ளம் பெருக்கெடுத்து ஓடுகிறது. தாழ்வான பகுதிகளிலும் வெள்ளம் தேங்கியதால் அந்த வழியாக வாகன போக்குவரத்து முடங்கியது.

நாகர்கோவிலிலிருந்து திருவனந்தபுரம் விமான நிலையம் செல்லும் பிரதான சாலையான பூவாறு-விழிஞம் சாலையில் வெள்ளம் பெருக்கெடுத்து ஓடுவதால் விமான நிலையத்திற்கு செல்லும் பயணிகள் பெரிதும் பாதிக்கப்பட்டனர்.

நெடுமங்காட்டில் மழையால் 2 வீடுகள் இடிந்தன. ஒரு வீட்டின் மதில் சுவர் சரிந்து விழுந்தது. அதிர்ஷ்டவசமாக இதில் யாருக்கும் பாதிப்பு இல்லை. இதுபோல கவுன்சிலர் காசிம் என்பவரின் வீடும் இடிந்தது. மழையுடன் பலத்த காற்றும் வீசியதால் மரங்கள் முறிந்து விழுந்தன. ரப்பர் மரங்களும் முறிந்ததால் பால் வெட்டும் பணி பாதிக்கப்பட்டது.

சாலையோர மரங்கள் முறிந்து விழுந்ததில் மின்கம்பங்கள் சேதமானது. இதனால் அந்த பகுதியில் பல மணி நேரம் மின்தடை ஏற்பட்டது. பருவமழை தீவிரம் அடைந்ததை தொடர்ந்து கேரள கடலோர பகுதிகளிலும் கனமழை பெய்கிறது.

கடலில் குறைந்த காற்றழுத்த தாழ்வு நிலை உருவானதால் கடலில் 50 முதல் 60 கிலோ மீட்டர் வேகத்தில் காற்று வீசும் எனவும் மீனவர்கள் எச்சரிக்கையாக இருக்கும்படியும் திருவனந்தபுரம் வானிலை ஆய்வு மையம் அறிவித்துள்ளது.

காற்றழுத்த தாழ்வு நிலை காரணமாக கேரளாவில் உள்ள அனைத்து துறைமுகங்களிலும் 3-ம் எண் புயல் கூண்டு ஏற்றப்பட்டுள்ளது. கேரளாவில் இப்போது பெய்து வரும் தென்மேற்கு பருவமழையால் மாநிலத்திற்கு 98 சதவீதம் அளவுக்கு மழை பொழியும் என எதிர்பார்ப்பதாக வானிலை ஆய்வு மையத்தினர் கூறி இருப்பதால் மாநிலத்தில் அதிக அளவு மழை பெய்யும் என்று எதிர்பார்க்கப்படுகிறது.

#+ #+ #+ #+ #+ மழை கொட்டோ கொட்டுனு கொட்ட போகுதே :# :# :#