நீர்பிடிப்பு பகுதியில் கன மழை: மேட்டூர் அணை நீர்மட்டம் உயர்ந்து வருகிறது

மேட்டூர், ஜூன். 3-

கேரளா, கர்நாடகம் ஆகிய மாநிலங்களில் கடந்த 2 ஆண்டுகளாக பருவ மழை ஏமாற்றியதால் காவிரி நீர்பிடிப்பு பகுதிகளில் போதிய மழை இல்லை. இதனால் காவிரி ஆற்றில் போதிய நீர்வரத்து இல்லாமல் குறைந்து காணப்பட்டது. இதனால் காவிரி ஆறு வெறும் பாறைகளாக காட்சி அளித்தது.

கரைபுரண்டு ஓடிய நீர் வற்றியதால் காவிரி ஆறு ஓடை போல் காட்சி அளித்தது. இதனால் இந்தியாவின் நயகரா என்று அழைக்கப்படும் ஒகேனக்கல்லில் பெரும்பாலான அருவிகள் வற்றிய நிலையில் பாறைகளாக காட்சி அளித்தன.

இந்நிலையில் கேரளா மற்றும் கர்நாடகாவில் தென்மேற்கு பருவமழை தற்போது தொடங்கியுள்ளது. அதன் ஒரு பகுதியாக தமிழக-கர்நாடக எல்லையில் உள்ள காவிரி நீர்பிடிப்பு பகுதிகளில் கடந்த சில நாட்களாக கன மழை பெய்கிறது.

இதை தொடர்ந்து காவிரி ஆற்றில் நீர்வரத்து அதிகரித்துள்ளது. வறண்டு பாறைகளாக காட்சி அளித்த நீர்வீழ்ச்சி பகுதிகளில் செந்நிறத்தில் தண்ணீர் கொட்டுகிறது. இதை சுற்றுலா பயணிகள் கண்டு ரசித்தனர். பாறைகளுக்கு இடையே செந்நிறத்தில் ஓடும் ஆற்று நீரில் பயணிகள் பரிசலில் பயணம் செய்தனர்.

மேலும் மேட்டூர் அணை நீர்பிடிப்பு பகுதிகளிலும் மழை பெய்து வருகிறது. இதன் காரணமாக கடந்த 3 மாதத்துக்கு பிறகு மேட்டூர் அணைக்கு நீர்வரத்து அதிகரிக்க தொடங்கி இருக்கிறது.

நேற்று மாலை அணைக்கு 300 கன அடி தண்ணீர் வந்தது. இது அதிகரித்து இன்று காலை 1600 கனஅடி வந்து கொண்டு இருக்கிறது. இதனால் அணையின் நீர்மட்டமும் 18.75 அடியாக உயர்ந்து இருக்கிறது. தொடர்ந்து நீர்வரத்து அதிகரிக்கும் பட்சத்தில் நீர்மட்டமும் உயரும். அணையில் இருந்து குடிநீர் தேவைக்காக தொடர்ந்து 600 கனஅடி தண்ணீர் வெளியேற்றப்பட்டு வருகிறது.

விவசாயிகளுக்கு மகிழ்ச்சியான செய்தி #+ #+ #+ :{ :{ :{