தலைமுறை இடைவெளியும் நாமும்- சில ஆலோசனைகள்

by *சம்ஸ் Mon 3 Jun 2013 - 18:48

தலைமுறை இடைவெளியும் நாமும்- சில ஆலோசனைகள்

• இளையவர்களாக இருந்தால் நாளை நாமும் முதியவர்களாவோம் என்ற யதார்த்தத்தை ஏற்றுக்கொள்ளுங்கள்மூத்தவர்களாக இருந்தால் இளையவர்களை அன்பு காட்டி அரவணைக்க வேண்டும் .என்ற உணர்வை உள்ளங்களில் விதைத்துக் கொள்ளுங்கள்.

• அவர்கள் தங்களுக்குச் செவிமடுப்பவர்களை விரும்புகிறார்கள்.மூத்தவர்கள் பேசும் போது சில விடயங்களை திருப்பி திருப்பிச் சொல்வார்கள்.உங்களுக்குக் கஷ்டமாக இருந்தாலும் பொறுத்துக் கொள்ளுங்கள்.அவர்களுக்கு உங்கள் செவிகளைக் கொடுங்கள்.

• மூத்தவர்களிடம் பேசும் போது அவர்களுடைய கால வாழ்க்கை முறை,வாழ்வியல் அனுபவங்கள்,துன்பியல் நிகழ்வுகள் மற்றும் சாதனைகள் பற்றிக் கேளுங்கள்.உங்களுக்கு மிக சுவாரசியமான கதைகளுக்கான கருக்கள் கிடைக்கலாம்.

• நீங்கள் எந்த வயதினராக இருந்தாலும் சரி, உங்களை விட மூத்தவர்கள் முன் கால் மேல் கால் போட்டு அமராதீர்கள்.உங்கள் உள்ளத்திலும் உடலசைவுகளிலும் பணிவை வெளிப்படுத்துங்கள்;அது போலியாக இல்லாமல் உள்ளார்ந்ததாக இருக்கட்டும்.

• அவர்களுக்கு சின்னச் சின்ன சந்தோஷங்களை வழங்குங்கள்.உ+ம் அவர்களது பழைய நண்பர்கள்/நண்பிகளைச் சந்திக்க அழைத்துச் செல்வது, மிகவும் பிடிக்கும் ஒரு புத்தகத்தைப் பரிசளிப்பது,அவர்களுக்கான விசேட சாப்பாட்டைத் தயார் பண்ணுவது.

• ஒரேயடியாக ,உங்களுக்கு எதுவும் தெரியாது என்று மூத்தவர்களை ஒதுக்கி விட வேண்டாம்.அவர்களுடைய அனுபவங்கள் எமது வாழ்க்கைக்கு வலிமை சேர்க்கும்.

• நவீன உலகின் சாதனங்களான கணினி,கைப்பேசி,ஒவன் பற்றி அவர்களுக்குத் தெரியாதிருக்கலாம், கேலி செய்யாதீர்கள், கற்றுக்கொடுங்கள்.

• உள்ளத்துக்கு முதுமை கிடையாது.அவர்களின் வயதினைக் குறிப்பிட்டு அல்லது அவர்களது நோய்களை ஞாபகப்படுத்தி அவர்களை உளரீதியாக விழச்செய்யாதீர்கள்.உள்ளம் சோரும் போது பலவீனம் சேர்ந்து கொள்ளும்.சாதித்தவர்களை அல்லது வாழ்க்கையின் பின் பகுதிகளில் வெற்றிபெற்றவர்களின் வரலாறுகளைக் கூறித் தெம்பூட்டுங்கள்.

• வீட்டில் அல்லது பணியிடத்தில் முக்கியமான முடிவுகளை எடுக்க நேரிடும் போது மூத்தவர்களின் ஆலோசனை கேட்பதும் விசேட நிகழ்வுகளிலும் அவர்களுக்கும் பொறுப்புக்கள் வழங்குவதும் அவர்களின் உற்சாகத்தைப் பலமடங்காக அதிகரிக்கும்.

• ‘நீங்கள் எமக்கு முக்கியமானவர்’ என்ற தகவலை அவர்களுக்கு முடியுமான எல்லா இடங்களிலும் உணர்த்துங்கள்.அவர்களுக்கு முன்னுரிமை வழங்குங்கள். நீங்கள் வங்கியில் அல்லது மருத்துவரிடம் க்யூவில் நிற்கும் போது அவர்களை முதன்மைப்படுத்துங்கள்.

• மூத்தவர்களை உங்களில் முழுமையாகத் தங்கி வாழ்பவர்களாக ஆக்கி விடாதீர்கள்.ஒவ்வொருவருக்கும் தனித்தன்மையும் தன்மானமும் உண்டு.அவர்களுக்கு இயலுமான வரையில் உழைக்கவும், ஓய்வு பெற்ற பின்பும் சமூக வேலைகள் மற்றும் பொழுதுபோக்குகளில் ஈடுபடுவதற்கும் வாய்ப்புக்களை ஏற்படுத்திக் கொடுப்பது நிறைவு தரும் விடயமாகும்.

• வீணாக அவர்களோடு விவாதிக்க வேண்டாம்,சமயங்களில் உங்கள் பக்க நியாயத்தை விட்டுக் கொடுக்கவும் தயங்க வேண்டாம்.அவர்கள் வேறோர் காலப்பகுதியில் வாழ்ந்தவர்கள்.அதனைப் புரிந்து கொள்ளுங்கள்.

• மூத்தவர்களின் ஆற்றல்களைக் குறைத்து மதிப்பிடாதீர்கள்.அவர்கள் விரும்பிச் செய்யக்கூடிய பொழுதுபோக்குகளில் அவர்களை ஈடுபடுத்துவதோடு அதற்குத் தேவையான உபகரணங்களையும் வாங்கிக் கொடுங்கள்.

• தங்களுக்கு விரும்பிய சின்னச் சின்னப் பொருட்களை வாங்குவதற்கும் பேரப்பிள்ளைகளை மகிழ்ச்சிப்படுத்தவும் தோதானவாறு அவர்கள் கையில் காசு புழங்க வழிவகை ஏற்படுத்திக் கொடுங்கள்.நீங்கள் தான் எல்லா செலவுகளையும் செய்கிறீர்கள்,ஆனால் அவர்கள் சுயமாக செலவழிக்க விரும்புவதைப் புரிந்து கொள்ளுங்கள்.
_
- சமீலா யூசுப் அலி
எங்கள் தேசம் —