3 சிறுவர்கள் பலி: பட்டாசு ஆலை உரிமையாளர் கைது

by *சம்ஸ் Mon 29 Jul 2013 - 8:15

வேட்டவலம், ஜ×லை.29-

திருவண்ணாமலையில் இருந்து வேட்டவலம் செல்லும் சாலையில் உள்ள ராஜதாங்கல் கிராமத்தை சேர்ந்தவர் சண்முகம் (வயது55). இங்கு கடந்த 20 ஆண்டுகளாக அனுமதி பெற்று பட்டாசு தயாரித்து வருகிறார். பட்டாசு தயாரிக்கும் இடத்தின் அருகிலேயே அதை பாதுகாத்து வைக்கும் குடோனும் வைத்துள்ளார்.

நேற்று அதே கிராமத்தை சேர்ந்த முருகனின் மகன் அய்யப்பன் (வயது15), மணியின் மகன் சுபாஷ் (வயது16), பண்டிதப்பட்டு கிராமத்தை சேர்ந்த சிவாவின் மகன் சின்னராஜ் (வயது 16) ஆகிய 3 பேரும் பட்டாசு குடோனில் வேலை செய்து கொண்டிருந்தனர்.

மாலை 3.30 மணியளவில் பட்டாசு குடோனில் திடீரென்று குண்டு வெடிப்பது போன்ற சத்தம் கேட்டது. அதை கேட்ட கிராம பொது மக்கள் அங்கு சென்று பார்த்தனர். பட்டாசு குடோன் இடிந்து தரைமட்டமாகி கிடந்தது. அங்கு வேலை செய்து கொண்டிருந்த சுபாஷ், அய்யப்பன் ஆகியோர் 200 மீட்டர் தூரத்தில் தூக்கி வீசப்பட்டு உடல் சிதைந்த நிலையில் இறந்து கிடந்தனர்.

சின்னராஜின் கால்கள் துண்டிக்கப்பட்டு 500 மீட்டர் தூரத்தில் கிடந்தது. அவர் உயிருக்கு போராடிக் கொண்டிருந்தார். உடனடியாக அவரை மீட்டு 108 ஆம்புலன்ஸ் மூலம் திருவண்ணாமலை அரசு ஆஸ்பத்திரிக்கு கொண்டு சென்றனர்.

ஆனால் வழியிலேயே சின்னராஜ் பரிதாபமாக இறந்தார். பலியானவர்களில் அய்யப்பன் 10-ம் வகுப்பு படித்து வந்தார். 3 பேர் இறந்ததை தொடர்ந்து சம்பந்தப்பட்ட பட்டாசு குடோன் உரிமையாளர் மீது நடவடிக்கை எடுக்க கோரி திருவண்ணாமலை- விழுப்புரம் ரோட்டில் சாலை மறியல் போராட்டத்தில் ஈடுபட்டனர்.

மறியல் செய்த பொதுமக்களை சமாதானம் செய்து உரிய நடவடிக்கை எடுப்பதாக போலீசார் உறுதியளித்தனர். அதைத் தொடர்ந்து மறியல் போராட்டம் கைவிடப்பட்டது. இதுகுறித்து வேட்டவலம் போலீசார் வழக்குப்பதிவு செய்து விசாரணை நடத்தி வருகின்றனர்.

திருவண்ணாமலை டி.எஸ்.பி. சரவணகுமார், இன்ஸ்பெக்டர்கள் சந்திரசேகரன், பழனி, குணசேகரன் ஆகியோர் தலைமறைவான பட்டாசு தொழிற்சாலை உரிமையாளர் சண்முகம், அவரது மகன் கோபியை தேடி வந்தனர். இன்று காலை அவர்களை கைது செய்தனர். அவர்களிடம் விசாரணை நடத்தி வருகின்றனர்.