மலைப்பாம்பு ஜோடிக்கு திருமணம்! ஆயிரத்துக்கும் மேற்பட்ட விருந்தாளிகள் கலந்து கொண்டனர்

கம்போடியாவின் ஒரு கிராமத்தைச் சேர்ந்த மக்கள் வித்தியாசமான ஒரு திருமண விழாவை கொண்டாடினர்.
ஒரு மலைப்பாம்பு ஜோடிக்கு அவர்கள் திருமணம் செய்து வைத்தனர். தமது கிராமத்துக்கு இந்தத் திருமணம் நன்மைகளைக் கொண்டு வரும் என்பது அவர்களின் நம்பிக்கையாகும்.
செம்ரூன் என்ற மணமகன் மலைப்பாம்புக்கும், ரொங்பிச் என்ற மணமகள் மலைப்பாம்புக்கும் தான் திருமணம் நடந்தது.
இந்தத் திருமண நிகழ்வை சுமார் ஆயிரம்பேர் கண்டு மகிழ்ந்தனர். எமது கிராமத்தைவிட்டு தீய சக்திகள் நீங்கி நல்லவை பெருக வேண்டும் என்பதற்காகத் தான் இந்தத் திருமணச் சடங்கை நடத்தினோம் என்று நெத் வீ என்ற 41 வயதான கிராமவாசி கூறினார்.
இவரின் வீட்டில் 1994 முதல் வளர்க்கப்பட்டு வருவது தான் செம்ரூன் என்ற மணமகன் மலைப்பாம்பு. இது ஒரு விரல் அளவு கொண்டதாக இருக்கும் போது அவரின் மீன்பிடி வலையில் சிக்கியது. இப்போது வளர்ந்து மணமகன் வயதை அடைந்துள்ளது
ஒரு மாதத்துக்கு முன் காணாமல் போயிருந்த இது திருமணத்துக்கு ஒரு வாரம் முன்பு தான் மீண்டும் வீடு திரும்பியிருந்தது. குறி கூறும் சிலரின் ஆலோசனைக்கு அமையவே கிராமத்துக்கு நன்மை கிடைப்பதற்கான ஒரு வழியாக இந்தத் திருமணம் நடத்தப்பட்டுள்ளது.
கம்போடிய சம்பிரதாயங்களின் படி இந்தத் திருமண வைபவத்தில் கலந்து கொண்டு பௌத்த மதகுருமார் ஆசியும் வழங்கினர். திருமணத்துக்குப் பின் இரண்டு மலைப்பாம்புகளும் ஒரே கூட்டுக்குள் அடைக்கப்பட்டன.
அப்போது மக்கள் கூடியிருந்து வாழ்த்தியதோடு பணம் உட்பட பரிசுகளையும் வழங்கினர். கம்போடிய கிராமப் பகுதிகளில் பௌத்த மதம் பின்பற்றப்பட்டாலும் அங்கு மூட நம்பிக்கைகளுக்கும் பஞ்சமில்லை.Share70