நாம் கொஞ்சம் மழை கொஞ்சம்

by **rammalar** Sun 10 Nov 2013 - 15:44

-

இருட்டுவெளி எங்கும்
மின்னிமின்னிக் காட்டுகிறது
இன்னொரு மழை வானம்!
-
மழை குடிக்கும் மரம் கொஞ்சம்
தலை குளிக்கும் கூரையை
குடைபிடித்தபடி நனையும்
வீடு கொஞ்சம்
தொலைதூர வெட்டவெளி கொஞ்சம்!
-

நீ கொஞ்சம், நான் கொஞ்சம்
நாம் கொஞ்சம்
நம் விரல் பின்னல்கள் கொஞ்சம்!
-
பட்டுத்தெறிக்கும் மழைத்துளிகள்
சுட்டுத்தீயும்
நம் உஷ்ணம் கொஞ்சம்!
-
நனைந்தூறிய பூக்கள் கொஞ்சம்
அதில், நனையும் பிழியும், கிழியும்
மேகத்தின் ரகசியம் கொஞ்சம்
இருட்டுவெளி எங்கும்
மின்னிமின்னிக் காட்டுகிறது
-
பழைய மின்னல்
பதிவு செய்திருந்த காட்சிகளிளெல்லாம்
நம் சலனங்களும்,
நம் சங்கமங்களும் கொஞ்சம்…
அதில், கொஞ்சம்
குளிர் விட்டுப் போன நம்மால்
குளிர் காய்ந்து கொள்கிறது
நம் மழை கொஞ்சம்!
-
நீ விடை கொடுத்த
ஒற்றையடிப்பாதை எனக்கு
இன்னும் இன்னும் கொஞ்சம்
நீளுமோ!
=
நரைத்த தனிமையோடும்
இருட்டுவெளி எங்கும்
மின்னிமின்னிக் காட்டுகிறது
இன்னொரு மழைவானம்!
-

எப்போதும்
அடிவானில் இடைவிடாது
நனைந்து கொண்டே இருக்கும்
நம் உலகம் கொஞ்சம்!

==============================
- விவேகானந்த பாஸ்கர்.
திருநெல்வேலி.