15ஆம் திகதி முதல் பலத்த மழை பெய்யும் அறிகுறி காற்றழுத்த தாழ்வு மண்டலம் சென்னை நோக்கி நகர்வு

15ஆம் திகதி முதல் பலத்த மழை பெய்யும் அறிகுறி காற்றழுத்த தாழ்வு மண்டலம் சென்னை நோக்கி நகர்வு
தென் கிழக்கு வங்கக் கடலில் சில நாட்களுக்கு முன் உருவான காற்றழுத்த தாழ்வு பகுதி தீவிரம் அடைந்து வருகிறது. இதன் காரணமாக தமிழகத்தின் தென் மாவட்டங்களில் பலத்த மழை பெய்து வருகிறது.

காற்றழுத்த தாழ்வு பகுதி மேலும் தீவிரம் அடைந்து வட தமிழ்நாடு நோக்கி நகர் ந்து வருவதால் சென்னை - நாகை இடையே காற்றழுத்த தாழ்வு மண்டலமாகவே கரையை கடக்கும். இதன் காரணமாக அடுத்த 48 மணி நேரத்தில் (15 ஆம் திகதி)யில் இருந்து வட தமிழ் நாட்டில் அதிக சேதம் ஏற்படுத்தும் வகையில் பலத்த மழை பெய்யும் என்று வானிலை அவதான நிலையம் எச்சரித்துள்ளது.

இது குறித்து சென்னை வானிலை ஆய்வு அவதான நிலைய இயக்குனர் எஸ். ரமணன் கூறியதாவது: நேற்றுமுன்தினம் தென் கிழக்கு வங்கக் கடலில் நிலை கொண்டிருந்த தீவிர காற்றழுத்த தாழ்வு பகுதி நேற்று காலை தாழ்வு மண்டலமாக வலுப்பெற்றுள்ளது. இது சென்னைக்கு தென் கிழக்கே 650 கி. மீ. தொலைவில் நிலை கொண்டுள்ளது.

இந்த காற்றழுத்த தாழ்வு மண்டலம் மேற்கு, வட மேற்கு திசையில் நகர்ந்து ஆழ்ந்த காற்றழுத்த தாழ்வு மண்டலமாக மாறி சென்னைக்கும், நாகைக்கும் இடையே கரையை கடக்கும்.

இதன் காரணமாக 15 ஆம் திகதி (வெள்ளிக்கிழமை) இரவு முதல் 16 ஆம் திகதி வரை கன மழை பெய்யும். காற்றும் 60 கி. மீ. முதல் 75 கி. மீ. வேகத்தில் வீசும். கடல் பயங்கர கொந்தளிப்பாக இருக்கும். எனவே மீனவர்கள் கடலுக்குள் மீன் பிடிக்கச் செல்ல வேண்டாம் என எச்சரிக்கப்படுகிறது. கடலில் மீன் பிடித்துக் கொண்டு இருப்பவர்களும் உடனடியாக கரைக்கு திரும்ப வேண்டும்.

தினகரன்

:”@: :”@: