வெற்றிலை வரலாறு காணாத விலை ஏற்றம்

ப.வேலூர்: ஒரு சுமை வெற்றிலை, வரலாறு காணாத அளவுக்கு, 4,000 ரூபாய்க்கு ஏலம் போனதால், ப.வேலூர் பகுதியில் வெற்றிலை பயிரிட்ட விவசாயிகள் பெரும் மகிழ்ச்சி அடைந்துள்ளனர். ப.வேலூர் பகுதிக்கு உட்பட்ட பொத்தனூர், பாண்டமங்கலம், ஜேடர்பாளையம், ப.வேலூர், பாலப்பட்டி, மோகனூர் உள்ளிட்ட காவிரிக்கரையோர பகுதிகளில், 2,000 ஏக்கர் பரப்பளவில் வெற்றிலை பயிர் சாகுபடி செய்யப்படுகிறது. இங்கு கற்பூரம் மற்றும் வெள்ளைமார் என, இரண்டு வகையான வெற்றிலை சாகுபடி செய்யப்படுகிறது. அறுவடை செய்யப்படும் வெற்றிலைகள், ப.வேலூரில் உள்ள ஆறு தினசரி வெற்றிலை மண்டிக்கு ஏலத்துக்கு கொண்டு செல்லப்படுகிறது. ஈரோடு, கோவை, பொள்ளாச்சி உள்ளிட்ட மாவட்டங்களில் இருந்தும், கேரளா, ஆந்திரா, கர்நாடகா போன் வெளி மாநிலங்களில் இருந்தும் ஏராளமான வியாபாரிகள் வந்து, போட்டி போட்டு வெற்றிலையை ஏலம் எடுத்து லாரிகள் மூலம் எடுத்து செல்கின்றனர்.
நன்கு முதிர்ந்த வெற்றிலையை, 104 கவுளி கொண்ட ஒரு சுமையாக கட்டி, ஏல மண்டிக்கு கொண்டுச் செல்கின்றனர். சராசரியாக தினமும், 2,000 சுமைகள் ஏலத்துக்கு வருவது வழக்கம். இரண்டு வாரத்துக்கு முன்பு, 104 கவுளி கொண்ட கற்பூர வெற்றிலை ஒரு சுமை, 500 ரூபாய்க்கும், வெள்ளைமார் ஒரு சுமை, 1,500 ரூபாய்க்கும் ஏலம் போனது. அதை தொடர்ந்து, வெற்றிலையில் வாடல் நோய் தாக்கியதால், பயிர் கருகி விவசாயிகளுக்கு பெருத்த இழப்பை ஏற்படுத்தியது. அதனால், நேற்று நடந்த ஏலத்துக்கு, 600 சுமைகள் மட்டுமே வந்தது. வரத்து குறைவால் வெற்றிலை வரலாறு காணாத அளவுக்கு ஏலம் போனது. கற்பூர வெற்றிலை ஒரு சுமை, 4,000 ரூபாய்க்கும், வெள்ளைமார் ஒரு சுமை, 3,500 ரூபாய்க்கும் ஏலம் போனது. இந்த அதிரடி விலை உயர்வால் விவசாயிகள் மகிழ்ச்சி அடைந்துள்ளனர். இது குறித்து விவசாயிகள் சிலர் கூறியதாவது: இப்பகுதியில் வாழை, கரும்புக்கு அடுத்து பணப்பயிராக வெற்றிலை சாகுபடி செய்யப்படுகிறது. 2,000 ஏக்கர் பரப்பில் கற்பூரம் மற்றும் வெள்ளைமார் வெற்றிலை சாகுபடி செய்யப்படுகிறது. கடந்த சில வாரங்களுக்கு முன், 500 ரூபாய்க்கு ஏலம் போன கற்பூர வெற்றிலை நேற்று நடந்த ஏலத்தில் வரலாறு காணாத அளவுக்கு ஒரு சுமை, 4,000 ரூபாய்க்கு ஏலம் போனது. இந்த விலை உயர்வு எங்களுக்கு மகிழ்ச்சியை ஏற்படுத்தியுள்ளது. இவ்வாறு அவர்கள் கூறினர்.


நன்றி தினமலர்