தந்தையிடம் நீ அறிவை வாங்கலாம்...: உலக தந்தையர் தினம்-

குழந்தைகளின் முன்னேற்றத்தில் முக்கிய பங்கு வகிப்பவர் தந்தை. அன்னையிடம் அன்பை வாங்கலாம், தந்தையிடம் அறிவை வாங்கலாம் என பாடல் வரியே உண்டு.

பலருக்கு தந்தை தான் முன்மாதிரியாக இருப்பார். தந்தையருக்கு மரியாதையும், நன்றியும் செலுத்தும் விதமாக தந்தையர் தினம் ஜூன் 3வது ஞாயிற்றுக்கிழமை (ஜூன் 15) கொண்டாடப்படுகிறது. வெவ்வேறு நாடுகளில், வெவ்வேறு நாட்களில் இத்தினம் கடைப்பிடிக்கப்படுகிறது. இத்தினம் மேலைநாட்டிலிருந்து வந்திருந்தாலும் இந்தியாவில் பரவலாக ஏற்றுக்கொள்ளப்பட்டிருக்கிறது.ஒவ்வொருவரும் தங்களது தந்தைக்கு, நேரிலோ, போனிலோ அல்லது பூங்கொத்து கொடுத்தோ வாழ்த்து தெரிவித்து இத்தினத்தை கொண்டாடலாம்.

தோன்றிய விதம்:

அமெரிக்காவில் 1909ல் சொனாரா லூயிஸ் ஸ்மார்ட் டாட் என்ற பெண், அன்னையர் தினம் கொண்டாடுவது போல, தந்தையர் தினமும் கொண்டாடப்பட வேண்டும் என வலியுறுத்தினார். இவரது தாயாரின் மறைவுக்குப் பின், தந்தை வில்லியம் ஆறு குழந்தைகள் கொண்ட குடும்பத்தை சிரமங்களுக்கிடையே வழி நடத்தி வந்தார். இதுதான் தந்தையர் தினம் கொண்டாட வேண்டும் என்ற எண்ணத்தை இவருக்கு ஏற்படுத்தியது. இதன்படி 1910ம் ஆண்டு முதன்முதலில் தந்தையர் தினம் கொண்டாடப்பட்டது. 1972ல் அமெரிக்க ஜனாதிபதி ரிச்சர்ட் நிக்சனால், அந்நாட்டின் அங்கீகரிக்கப்பட்ட விடுமுறை தினமாக அறிவிக்கப்பட்டது.

நன்றி: தினமலர்.

இனிய தந்தையர் தின நல்வாழ்த்துக்கள்