'மோடியின் கனவு திட்டத்தை செயல்படுத்தினால்10 லட்சம் வேலைவாய்ப்புகள் உருவாக்கப்படும்'

ஆமதாபாத்:குஜராத் முதல்வராக, நரேந்திர மோடி இருந்த போது, அவரின் கனவு திட்டமாக இருந்த, 'கிப்ட்', நாடு முழுவதும் செயல்படுத்தப்பட்டால், கூடுதலாக, 10 லட்சம் வேலைவாய்ப்புகள் உருவாக்கப்படும் என, கூறப்பட்டு உள்ளது.

நாட்டின், வளர்ச்சி அடைந்த மாநிலங்களில் ஒன்றான, குஜராத்தின் முதல்வராக, 13 ஆண்டுகளாக இருந்த நரேந்திர மோடி, நாட்டின் பிரதமராக, சமீபத்தில் ஆகியுள்ளார். அவர், குஜராத்தில் முதல்வராக இருந்த போது, 'குஜராத் இன்டர்நேஷனல் பினான்ஸ் டெக் சிட்டி- கிப்ட்' என்ற பெயரில், உலக அளவில் நிதிச் சேவையாற்றும் கட்டமைப்பை உருவாக்கினார்.மொத்தம், 65 ஆயிரம் கோடி ரூபாய் செலவில், 673 ஏக்கர் பரப்பில் ஏற்படுத்தப்படும் அந்த திட்டம், 2022ல், பல லட்சம் புதிய வேலைவாய்ப்புகளை உருவாக்கும் என, கூறப்படுகிறது. இந்த திட்டத்தின் படி அமைக்கப்படும் கட்டமைப்பில், நிதிச் சேவை மற்றும் தகவல் தொடர்பு சேவைகள், உலக நிறுவனங்களுக்கு வழங்கப்படும்.

இந்த திட்டத்தின் நிர்வாக இயக்குனர், ராமகாந்த் ஜா கூறியதாவது:நாட்டின் பொருளாதார வளர்ச்சிக்கு, வேலைவாய்ப்பு மிகவும் முக்கியமானது. மோடியின் இந்த கனவு திட்டம், குஜராத்தில் வெற்றிகரமாக செயல்படுத்தப்படுகிறது. இதை நாடு முழுவதும் செயல்படுத்தினால், 10 லட்சம் புதிய வேலைவாய்ப்புகளை உருவாக்க முடியும். இதன் மூலம், நாட்டின் பொருளாதாரத்தை மேம்பாடு அடையச் செய்ய முடியும்.இவ்வாறு, அவர் கூறினார்.

-தினமலர்