இருபது கட்டளை

by **Nisha** Fri 27 Jun 2014 - 9:42

இருபது கட்டளை

படுக்கையில் எழுந்ததும் பற்களைத் துலக்கு
பகலது முளைத்திடும் திசை பெயர் கிழக்கு!
கடன்களை முடித்திடக் காலையில் பழக்கு
கடும்பசி வரும்முன் உண்பதை விலக்கு!
-
மனம் ஒரு நிலை பட மெளனத் தவமிரு
மணி சில ஒதுக்கியே உடற்கலை பழக்கிடு!
தினம் தினம் படித்திடத் திட்டம் தீட்டுக
திறமையைப் பலவற்றில் ஆக்கமாய் மாற்றுக!
-
பாரத பூமியில் பண்பாடு அறிவாய்
பழமையும் புதுமையும் சேர்ந்ததோர் உருவாய்!
நேரடி அனுபவம் நீ பெற வேண்டுமே
நீதியும் தருமும் நிலைத்திடும் என்றுமே!
-
பொய்க்கதை பேசியே பொழுதினைப் போக்குவார்
போலியாய்ப் பிழைத்திடும் பொல்லரை நீக்குவாய்!
உணமையைப் பேசிடும் உள்ளத் திடம் பெறு
உழைப்பால் உயர்ந்திடும் உத்தமக் குணம் பெறு!
-
தன்னிலைச் சரிவது தாழ்வென அறிவாய்
தன்னையே அறிந்தொரு ஞானமும் அடைவாய்!
அன்பெனும் வாளினால் ஆரையும் வீழ்த்துவாய்
அச்சமும் பதற்றமும் ஐயமும் போக்குவாய்!
-
இரவுடன் பகலும் இணைந்ததே முழுநாள்
இன்பமும் துன்பமும் தொடர்வதே வாழ்நாள்!
இருப்பது போதுமாய் வாழ்வது அருமை
இயற்கையின் நியதியை ஏற்பது பெருமை..!
================

>கவிஞர் மாதப்பன்