பஹ்ரைனில் ஆர்ப்பாட்டம் நீடிக்கிறது

பஹ்ரைன் தலைநகர் மனாமாவில் அரசாங்க எதிர்ப்பு ஆர்ப்பாட்டக்காரர்கள் தொடர்ந்து போராட்டங்களைச் நடத்திவரும் நிலையில், அந்நாட்டின் பாதுகாப்புப் படையினர் இராணுவ தாங்கிகள், பொலிஸ் வாகனங்கள் மற்றும் முட்கம்பி வேலிகள் போன்றவற்றைப் பயன்படுத்தி நகரத்தின் முக்கிய சதுக்கம் ஒன்றை முற்றுகையிட்டு அடைத்துள்ளனர்.

அந்நாட்டில் அனைத்து ஆர்ப்பாட்டங்களுக்கும் உள்துறை அமைச்சகம் தடை விதித்துள்ளது.

சட்ட ஒழுங்கை நிலைநாட்டுவதற்காக எவ்விதமான கடின நடவடிக்கையையும் எடுக்கத் தயார் என்று அவ்வமைச்சகம் கூறுகிறது.

நேற்றிரவு போராட்டம் செய்தவர்களை கலைக்க பாதுகாப்புப் படையினர் முன்னெச்சரிக்கை இன்றி துப்பாக்கி சூடு நடத்தியிருந்தனர்.

இந்த ஆர்ப்பாட்டங்களில் இதுவரை மூன்று பேர் கொல்லப்பட்டும், முந்நூற்றுக்கும் அதிகமானோர் காயமடைந்தும் உள்ளனர்.

ரப்பர் தோட்டாக்கள், கண்ணீர்ப் புகைக் குண்டுகளைத் தாண்டி நிஜ தோட்டாக்களும் ஆர்ப்பாட்டக்காரர்களுக்கு எதிராக பயன்படுத்தப்பட்டிருந்ததாக மனாமாவில் உள்ள பிபிசி செய்தியாளர் கூறுகிறார்.

கொந்தளிப்பிற்கான காரணம்

பஹ்ரைன், எண்ணெய் ஏற்றுமதி செய்யும் ஒரு நாடு, அது ஒரு வறிய நாடு அல்ல.

அந்த நாட்டின் பெரும்பான்மை மக்களான ஷியா மக்களுக்கும், ஆட்சியதிகாரத்தைக் தம் வசம் கொண்டுள்ள சுன்னி மேட்டுக்குடிக்கும் இடையில் நெடுங்காலமாக கனன்றுகொண்டிருக்கும் பதற்றம்தான் அங்கே கொந்தளிப்பு ஏற்படுவதற்கு மூல காரணம் ஆகும்.

வெளிநாடுகளில் இருந்து பஹ்ரைன் வரக்கூடிய சுன்னி முஸ்லிம்களுக்கு அந்நாட்டில் பிரஜாவுரிமை வழங்குவது என்ற அரசாங்கத்தின் சர்ச்சைக்குரிய கொள்கை பிரச்சினைகளின் ஒரு காரணமாக இருந்துவருகிறது எனலாம்.

பெரும்பான்மை இனமான ஷியாக்களுக்கு இடையில் அதிருப்தி மேலோங்க இக்கொள்கை வழிவகுத்திருந்தது.

நன்றி bbctamil