வெளிநாட்டிலிருந்து பணம் பெறுவதில் முதலிடத்தில் தமிழக நிறுவனங்கள்

சென்னை:மத்திய உள்துறை அமைச்சகம் நடத்திய ஆய்வில், தமிழகத்தைச் சேர்ந்த தன்னார்வ தொண்டு நிறுவனங்கள், வெளிநாடுகளில் இருந்து அதிகளவில் நிதியைப் பெற்றுள்ளது தெரிய வந்துள்ளது.

குழந்தைகள், பெண்கள், ஆதரவற்றோர், மாற்றுத்திறனாளிகள், பணியாளர்கள் என, பலரது மேம்பாட்டிற்கு என, தனித்தனியாக தொண்டு நிறுவனங்கள், நல அமைப்புகள் ஆயிரக்கணக்கில் செயல்பட்டு வருகின்றன.இவை, பெரும்பாலும் இங்குள்ள நிலைமையை எடுத்துக் கூறி, வெளிநாட்டில் இருந்து நிதியைப் பெற்று செலவழித்து வருகின்றன.இந்த வகையில், 2012ல், அதிகபட்சமாக, 2,285 கோடி ரூபாய் பெற்று, டில்லி முதலிடத்தையும்; 1,704 கோடி ரூபாய் பெற்று, தமிழகம் இரண்டாம் இடத்தையும் பிடித்துள்ளன.மாவட்ட அளவில், 889 கோடி ரூபாய் நிதியைப் பெற்று, சென்னை மாவட்ட என்.ஜி.ஓ.,க்கள் முதலிடத்தைப் பிடித்துள்ளன. அடுத்த இடத்தை, மும்பை 825.40 கோடி ரூபாய் பிடித்துள்ளது.கடந்த, 2002 03ல், சென்னையைச் சேர்ந்த பிரபல தன்னார்வ தொண்டு நிறுவனம், அதிகபட்சமாக, 393 கோடி ரூபாய் நிதியைப் பெற்றுள்ளதாகவும் தெரியவந்துள்ளது.

பதிவு ரத்து:

இதுதவிர, கடந்த, 2012ல் அதிகளவு தன்னார்வ தொண்டு நிறுவனங்களின் பதிவுகள், ரத்து செய்யப்பட்டுள்ளன. இதில், தமிழகம் முதல் இடத்தைப் பிடித்துள்ளது.தமிழகத்தில் மட்டும், 760 நிறுவனங்களின் பதிவுகள் ரத்து செய்யப்பட்டுள்ளன. அடுத்ததாக, ஆந்திராவில் 690; கேரளாவில் 439 நிறுவனங்களின் பதிவுகள் ரத்து செய்யப்பட்டுள்ளதாகக் கூறப்படுகிறது.

நன்றி:தினமலர்