20,000 மாணவர்களுக்கு பசும்பால் வழங்கும் திட்டம் மீண்டும் ஆரம்பம்

by **நண்பன்** Tue 2 Sep 2014 - 9:07

கிழக்கு மாகாணத்திலுள்ள சுமார் 20 ஆயிரம் பாடசாலை மாணவர்களுக்கு இடை நிறுத்தப்பட்டிருந்த பசும்பால் வழங்கும் திட்டம் மீண்டும் நேற்று செப். 1ம் திகதி முதல் ஆரம்பமாகியது.

கிழக்கு மாகாணத்திலுள்ள பாடசாலை மாணவர்களுக்கு வழங்கப்பட்டு வந்த பசும்பால் வழங்கும் திட்டம் ஓகஸ்ட் 5ம் திகதி முதல் இடை நிறுத்தப் பட்டிருந்தமை தெரிந்ததே. நேற்று முதல் வழங்கப்பட்டு வரும் பால்மா பக்கட்டுகள் வலயக் கல்விக் காரியாலயங்களுக்கு ஏலவே அனுப்பி வைக்கப்பட்டிருந்தன. அவை அந்தந்த கோட்டக்கல்விப் பணிப்பாளர்களினூடாக அதிபர்களிடம் ஒப்படைக்கப்பட்டுள்ளன.
ஆனால், இம்முறை புதிய நடைமுறை யொன்று அறிமுகப்படுத்தப்படவுள்ளது. அதாவது மாணவர்கள் பாலை அருந்திய பின்னர் அந்த வெற்றுப் பக்கட்டை மீள்சுழற்சிக்காக விற்பனை செய்ய முடியும். அல்லது அவ்வெறும் பக்கட்டுகளை சேகரித்து கோட்டக் கல்விக் காரியாலயத்தில் ஒப்படைக்க வேண்டும். அங்கு அது சேமிக்கப்படும்.
கிழக்கில் சுமார் 20 ஆயிரம் மாணவர்கள் இப்பசும்பால் பெறும் திட்டத்தில் இணைந்து பயன்பெறுவர்.
உண்மையில் கடந்த காலத்தில் பசும்பாலுக்குப் பதிலாக சத்துணவுத் திட்டத்தில் வழங்கப்படும் உணவுப் பொருட்களே மாணவர்களுக்கு வழங்கப்பட்டு வந்தது. ஆனால் தற்போது பால்பக்கட்டுகள் வழங்கப்படவுள்ளன.
எனினும் மாணவருக்கான சத்துணவு வழங்கும் திட்டம் தடையின்றி தொடர்ந்து வழங்கப்பட்டு வருகின்றது. அத்திட்டத்தின் கீழ் சுமார் ஒரு இலட்சத்து 20 ஆயிரம் மாணவர்கள் நன்மையடைந்து வருகிறார்கள் என்பது குறிப்பிடத்தக்கது.
நேற்று பாடசாலைகள் திறப்பு
இதேவேளை நேற்று செப். 1 ம் திகதி நாட்டிலுள்ள சிங்கள, தமிழ் பாடசாலைகள் மூன்றாம் தவணைக்காக மீண்டும் திறக்கப்பட்டன. க.பொ.த. உயர்தர விடைப் பத்திரங்கள் திருத்தப்படும் நிலையங்களாக இயங்கும் 10 பாடசாலைகள் மற்றும் தரம் 5 புலமைப் பரிசில் பரீட்சை விடைப்பத்திரங்களைத் திருத்தும் மத்திய நிலையங்களாகச் செற்படும் 34 பாடசாலைகளைத் தவிர ஏனைய அனைத்துப் பாடசாலைகளும் நேற்று முதல் இயற்கி வருகின்றன. முஸ்லிம் பாடசாலைகள் ஏற்கனவே ஓகஸ்ட் 4ம் திகதி முதல் மூன்றாம் தவணை கற்றல், கற்பித்தல் செயற்பாட்டிற்காக திறக்கப்பட்டமை தெரிந்ததே.
மூன்றாம் தவணை விடுமுறைக்காக இப்பாடசாலைகள் மீண்டும் டிசம்பர் மாதம் 5ம் திகதி மூடப்படும்.

தினகரன்