புலிகளின் தடைநீக்கத்திற்கு எதிராக மேன்முறையீடு செய்ய அரசாங்கம் ஒத்துழைப்பு

by **நண்பன்** Thu 23 Oct 2014 - 7:46

புலிகளின் தடைநீக்கத்திற்கு எதிராக மேன்முறையீடு செய்ய அரசாங்கம் ஒத்துழைப்பு
*
வெளிவிவகார அமைச்சு அறிவிப்பு
* அங்கத்துவ நாடுகளிடையே செயற்திட்டம் முன்னெடுப்பு புதிய ஒழுங்கு விதிகளை நிறைவேற்ற மாற்றுவழிகள்

ஐரோப்பிய ஒன்றியத்தில் புலிகள் மீதான தடை நீக்கப்பட்டதற்கு எதிராக முன்னெடுக்கப்படும் சகல நடவடிக்கைகளுக்கும் அரசாங்கம் தொடர்ந்து தனது ஒத்துழைப்பை வழங்கும் என வெளிவிவகார அமைச்சு அறிவித்துள்ளது.

வழக்குடன் தொடர்புடைய தரப்பினர் களுக்கு ஏற்கனவே தேவையான தகவல்களையும் ஒத்துழைப்பையும் வழங்கியதாக குறிப்பிட்டுள்ள வெளிவிவகார அமைச்சு இந்த விடயம் தொடர்பில் அக்கறை செலுத்தும் தரப்பினர்கள் முன்வைக்கும் கருத்துக்கள் உண்மைக்கு புறம்பானவை எனவும் அறிவித்துள்ளது.

ஐரோப்பிய ஒன்றியத்தில் புலிகள் மீதான தடை ஐரோப்பிய ஒன்றிய நீதிமன்றத்தினால் நீக்கப்பட்ட விடயம் தொடர்பில் விளக்கமளித்துள்ள வெளிவிவகார அமைச்சு மேலும் குறிப்பிட்டுள்ளதாவது, 2011 ஆம் ஆண்டு ஐரோப்பிய ஒன்றிய நீதிமன்றத்தில் புலிகளினால் வழக்குத் தாக்கல் செய்யப்பட்டது.

இந்த வழக்கில் ஐரோப்பிய ஒன்றிய கவுன்ஸில் பிரதிவாதியாக குறிப்பிடப்பட்டிருந்தது. இடையீட்டு தரப்பான நெதர்லாந்து, பிரிட்டன் மற்றும் ஐரோப்பிய ஆணைக்குழு என்பவற்றின் ஒத்துழைப்பு வழங்கப்பட்டது.

இந்த வழக்கு தொடரப்பட்டது முதல் ஐரோப்பிய ஒன்றியம், நிபுணத்துவ ஐரோப்பிய சட்டத்தரணிகள் ஆகியவற்றின் சட்ட ஆலோசனை மற்றும் நிபுணத்துவ ஆலோசனைகளை வெளிவிவகார அமைச்சு பெற்று வந்தது. இதன் பிரகாரம், பிரதிவாதிகள் மற்றும் இடையீட்டு தரப்பினருக்கு இலங்கை அரசாங்கத்தினால் அளிக்கக்கூடிய மிகவும் பயன்மிக்க வகையிலான தகவல்கள் முறையாகவும் தொடர்ச்சியாகவும் வழங்கப்பட்டன.

இலங்கை, ஐரோப்பிய ஒன்றிய உறுப்பு நாடாக இல்லாத காரணத்தினால் ஐரோப்பிய ஒன்றிய நீதிமன்றத்தில் தொடுக்கப்பட்ட வழக்கில் தலையிடுவதற்கு நாட்டின் தேசிய அபிலாஷைகளுக்கு முரணான விசேட நிபந்தனைகளுக்கு தலைசாய்க்க வேண்டியிருந்தது. அதனாலே இவ்வாறான மாற்று நடவடிக்கையை அரசாங்கம் மேற்கொண்டதாக வெளிவிவகார அமைச்சு தெரிவித்துள்ளது.

இத்தகைய நிலையில் எல்.ரீ.ரீ.ஈ.யின் கோரிக்கையை நிராகரிப்பதற்குத் தேவையான சகல தகவல்களையும் அரசாங்கம் ஐரோப்பிய ஒன்றியத்துக்கு வழங்கியிருந்தது. தீர்ப்பு வழங்கப்பட்டுள்ள நிலையில் பிரதிவாதிகளுக்கும் இடையீட்டு தரப்பினருக்கும் குறிப்பிட்ட காலப்பகுதிக்குள் மேன் முறையீடு செய்வதற்கு அவகாசம் இருக்கிறது.

இந்த வழக்குடன் தொடர்புள்ள தரப்பினருக்கு வழக்கு தொடர்பில் மேன் முறையீடு செய்யவும், ஐரோப்பிய ஒன்றிய அங்கத்துவ நாடுகளிடையே தேசிய செயற்திட்டமொன்றை முன்னெடுக்கவும், கட்டுப்பாடு விதிக்கும் புதிய ஒழுங்கு விதிகளை நிறைவேற்றவும் என சில மாற்று வழிகள் காணப்படுகின்றன எனவும் அமைச்சு சுட்டிக்காட்டியுள்ளது.

எல்.ரீ.ரீ.ஈ.யுடன் தொடர்புள்ள தரப்பினர் அச்சுறுத்தலான வகையில் பலாத்காரமாக பணம் திரட்டுவதினூடாக இலங்கை பிரஜைகளுக்கு ஏற்படும் அச்சுறுத்தலையும் நாட்டினுள் பயங்கரவாதம் மீண்டும் தலைதூக்கும் இயலுமையையும் கருத்திற் கொண்டு அரசாங்கம் வழக்குடன் தொடர்புள்ள தரப்பினருக்கு ஏற்கெனவே ஒத்துழைப்பு வழங்கி வருகிறது.

அவர்கள் எதிர்காலத்தில் முன்னெடுக்கும் நடவடிக்கைகளுக்கும் தொடர்ந்து அரசாங்கம் ஆதரவு வழங்கும். அரசாங்கம் மேற்படி விடயம் தொடர்பிலான நடவடிக்கைகளுக்கு அதிக முன்னுரிமை அளித்து செயற்படுகிறது எனவும் அமைச்சு குறிப்பிட்டுள்ளது.

தினகரன்