குழந்தைகளுக்கும் வரலாம் கண்புரை நோய்!

by **ahmad78** Tue 11 Nov 2014 - 12:09

கண்புரை நோய் என்பது முதியவர்களை தாக்கும் பார்வைப் பிரச்னை என்பது எல்லோருக்கும் தெரியும். பார்வை மங்குதல், எல்லாம் இரண்டிரண்டாகத் தெரிவது, பகல் வெளிச்சத்திலேயே கண் கூசுவது என இதன் அறிகுறிகளை அனுபவித்த அனைவரும் அறிவர். முதுமையில் எட்டிப் பார்க்கிற இந்தப் பிரச்னை, பிறந்த குழந்தையை பாதிக்கும் என்றால் நம்ப முடிகிறதா? பாதிக்கிறது என்பதுதான் உண்மை!

பிறந்தவுடன் குழந்தைகளைப் பாதிக்கிற கண்புரை பிரச்னை பற்றியும், அதற்கான காரணங்கள், அறிகுறிகள், தீர்வுகள் பற்றியும் விரிவாகப் பேசுகிறார் குழந்தைகளுக்கான கண் மருத்துவர் பிரவீண் கிருஷ்ணா. ‘‘பிறக்கிற ஒவ்வொரு ஆயிரம் குழந்தைகள்லயும், 3 முதல் 6 குழந்தைகளுக்கு இந்தப் பிரச்னை வரும். இந்தியாவுல கொஞ்சம் அதிகம். சாதாரண லென்ஸோட பளிச் தன்மை மாறி, வெள்ளையாவதைத்தான் கேட்டராக்ட்னு சொல்றோம். பெரியவங்களுக்கு வரக்கூடிய இதே பிரச்னை குழந்தைங்களுக்கும் வரலாம். அது பிறந்த உடனேயோ அல்லது பிறந்த ஆறு வாரங்கள்லயோ தெரிய வரும்.

இப்படி பாதிக்கப்பட்ட குழந்தைகளோட கண்களுக்குள்ள ஒளி போகாது. பார்வை மற்றும் நரம்பு வளர்ச்சி இருக்கணும்னா, குழந்தையோட கண் பார்த்துக்கிட்டே இருக்கணும். ஒளி உள்ளே போனாதான், பார்க்க முடியும். இந்தப் பிரச்னை, குழந்தையோட ஒரு கண்ல மட்டுமோ, ரெண்டு கண்கள்லயுமோ வரலாம். ரெண்டு கண்கள்லயும் பாதிப்பு வந்தா, கண்டுபிடிக்கிறது சுலபம். ஒரு கண்ல மட்டும்னா, இன்னொரு கண்ணால குழந்தை பார்த்துக்கிட்டிருப்பதால, குறை அத்தனை சீக்கிரம் தெரியாது. குழந்தை பார்க்கிறதுல ஏதாவது அசாதாரணம் தெரிஞ்சா, உடனே டாக்டர் கிட்ட போகணும்.

குழந்தை வயித்துல இருக்கிறப்ப, அம்மாக்களுக்கு சரியான சாப்பாடும், ஊட்டச்சத்தும் இல்லாமப் போகறதுதான் முதல் காரணம். அடுத்ததா, கர்ப்ப காலத்துல அம்மாவுக்கு உண்டாகிற இன்ஃபெக்ஷன். எந்த ஒரு உடல் உபாதைக்கும் சுய மருத்துவம் பண்ணக் கூடாதுன்னு எச்சரிக்கிறது இதுக்காகத்தான். குழந்தை பிறந்த உடனே அதுக்கு சரியான ஊட்டச்சத்து கிடைக்காததும், பிறந்ததும் அடிபடறதும் மூணாவது காரணம்.
அறுவை சிகிச்சைதான் இதுக்கான ஒரே தீர்வு.

ஆனா, பெரியவங்களுக்கு செய்யற மாதிரி பச்சிளங்குழந்தைக்கு லென்ஸ் வைக்க முடியாது. கண் வளர வளர, லென்ஸ் அந்த வளர்ச்சிக்கு ஈடு கொடுத்து வளரப் போறதில்லை. அதனால் குழந்தைகளுக்கு முதல்ல கேட்டராக்டை மட்டும் நீக்கிட்டு, கண்ணாடி கொடுக்க வேண்டியிருக்கும். அவ்வளவு சின்ன குழந்தைக்கு கண்ணாடியான்னு கேட்கலாம். வேற வழியில்லை. குழந்தை எப்பவெல்லாம் முழிச்சிட்டிருக்கோ, அப்பவெல்லாம் கண்ணாடி மாட்டி விட வேண்டியது அவசியம்.

கண் வளர்ச்சியடைந்து, குழந்தை பள்ளிக்கூடம் போகிறதுக்கு முன்னாடி, அறுவை சிகிச்சை செய்து பார்வையை முழுசா வரவழைக்க முடியும். அம்மாவை தாக்கும் ரூபெல்லா இன்ஃபெக்ஷன், குழந்தைக்கும் போறது மூலமாவும் இப்படி வரலாம். கர்ப்பம் தரிக்கிறதுக்கு முன்னாடியே, மருத்துவரோட ஆலோசனையை கேட்டு, ரூபெல்லா தடுப்பூசி எடுத்துக்கிறது பாதுகாப்பானது...’’ எச்சரித்து முடிக்கிறார் டாக்டர் பிரவீண் கிருஷ்ணா.

http://www.dinakaran.com/Medical_Detail.asp?cat=500&Nid=3024
Cataract is a disease that attacks the elderly, vision problems, everyone knows that. Blurring of vision