வழக்கு விவரங்களை செல்போன் மூலம் அறிந்து கொள்ள புதிய செயலி அறிமுகம்; சுப்ரீம் கோர்ட்டு நீதிபதி தகவல்

by **rammalar** Sun 29 Oct 2017 - 18:54

சென்னை,

நாடு முழுவதும் வழக்கு ஆவணங்களை ‘டிஜிட்டல்’ மயமாக்க சுப்ரீம் கோர்ட்டு முடிவு செய்தது. அதன்படி ஐகோர்ட்டு, மாவட்ட கோர்ட்டுகளில் டிஜிட்டல் மையங்கள் தொடங்கப்பட உள்ளன. இதற்கான பணிகள் நடந்து வருகிறது. சென்னை ஐகோர்ட்டில் அமைக்கப்பட்டுள்ள டிஜிட்டல் மையத்தின் திறப்பு விழா நேற்று நடந்தது.
சுப்ரீம் கோர்ட்டு நீதிபதி மதன் பி.லோகுர் மையத்தை திறந்து வைத்தார். அதேபோன்று சமரச தீர்வு மூலம் வழக்குகளுக்கு விரைவில் தீர்வு காண்பது குறித்த மாவட்ட நீதிபதிகளுக்கான பயிற்சியையும் அவர் தொடங்கி வைத்தார்.

இந்த நிகழ்ச்சியின் போது அவர் கூறியதாவது:–

ஆவணங்களை பாதுகாப்பாக வைத்திருப்பது நீதிபரிபாலனத்துக்கு மிகவும் அத்தியாவசியம் ஆகும். ஆவணங்களை டிஜிட்டல் மயமாக்குவதால் இடம் மிச்சமாகும். ஆவணங்களை ஸ்கேன் செய்து சேமித்து வைப்பதன் மூலம் தேவைப்படும் ஆவணங்களை எளிதாக பெற முடியும்.

கோர்ட்டில் நிலுவையில் உள்ள வழக்கு விவரங்களை செல்போன் மூலம் தெரிந்து கொள்ள புதிய செல்போன் செயலியை அறிமுகப்படுத்தி உள்ளோம்.

இந்த செயலி தொடங்கப்பட்ட ஒரு வாரத்தில் 2 லட்சம் பேர் இந்த செயலியை பதிவிறக்கம் செய்துள்ளனர். இந்த செயலி அடுத்த வாரம் முதல் முழுமையாக செயல்பாட்டுக்கு வரும்.

அதேபோன்று இ–மெயில் மூலம் வழக்குகள் குறித்த விவரங்களை அறிந்து கொள்ளும் வசதியையும் அறிமுகப்படுத்தி உள்ளோம். இந்த வசதி தொடங்கப்பட்ட 24 மணி நேரத்தில் 3 லட்சம் பேர் தங்களை சேர்த்துக்கொண்டுள்ளனர்.

தேசிய நீதித்துறை தகவல் தொகுப்பில் ஏற்கனவே 4 ஐகோர்ட்டுகள் இணைக்கப்பட்டுள்ளன. இதன்மூலம் வழக்கு விவரங்களை உடனுக்குடன் பெற முடியும். அடுத்த 10 நாட்களில் மேலும் 10 ஐகோர்ட்டுகள் இதில் இணைக்கப்படும்.

நீதி கிடைப்பதில் தாமதம் இருப்பதாக மக்கள் கூறி வருகின்றனர். மின்னனு மயமாக்கப்படுவதால் இன்னும் 2 மாதங்களில் இதில் பெரிய அளவில் மாற்றம் ஏற்படும்.
கோர்ட்டில் நிலுவையில் உள்ள வழக்குகளை சமரச தீர்வு மூலம் விரைந்து முடிக்க முடியும். இதனால் நிலுவையில் உள்ள வழக்குகளின் எண்ணிக்கை வெகுவாக குறையும். பொதுவாக சமரச தீர்வு 60 நாட்களுக்குள் முடிவுக்கு வர வேண்டும்.

ஆனால் புதுடெல்லியில் ஏராளமான வழக்குகள் 30 நாட்களில் முடிவுக்கு வந்துள்ளன. சமரச தீர்வு மூலம் பேசி தீர்க்கப்பட வேண்டிய வழக்குகளை முடிக்க சமரச தீர்வு மையத்தை அணுகுமாறு வக்கீல்களுக்கு, மாவட்ட நீதிபதிகள் அறிவுறுத்த வேண்டும். இவ்வாறு அவர் கூறினார்.

நிகழ்ச்சியில் சென்னை ஐகோர்ட்டு தலைமை நீதிபதி இந்திரா பானர்ஜி, நீதிபதிகள் ஹுலுவாடி ரமேஷ், ராஜீவ்சக்தேர், புஷ்பா சத்யநாராயணா, கிருஷ்ணகுமார், கிருபாகரன், வைத்தியநாதன், தமிழக அரசின் அட்வகேட் ஜெனரல் விஜய்நாராயண், சுப்ரீம் கோர்ட்டு வக்கீல் எஸ்.செந்தில்குமார் உள்பட பலர் கலந்து கொண்டனர்.

------------------------
தினத்தந்தி