ஆசிரியை வாக்கு அருள் வாக்கு!

by **rammalar** Sat 27 Oct 2018 - 6:03

-
சிவகங்கை மாவட்டம், பொன்னலிக் கோட்டையில் உள்ள,
ஊராட்சி ஒன்றிய தொடக்கப் பள்ளியில், 2ம் வகுப்பு
படித்த போது நடந்த சம்பவம் இது!

வகுப்பு ஆசிரியை கிறிஸ்டி கரும்பலகையில், பாடத்தை
எழுதி போட்டு, சிலேட்டில் எழுத சொன்னார்.

எழுதுவதற்கு குச்சி இல்லை; சக மாணவர்களிடம்,
கேட்கவும் தயக்கம்! ‘என்ன செய்யலாம்!’ என யோசித்த
போது, ஓலைச்சுவடியும், எழுத்தாணியுமாக திருவள்ளுவர்
அமர்ந்திருக்கும் புகைப்படத்தை வகுப்பறையில்
பார்த்ததும், ஆணியை வைத்து எழுதுவது என்ற முடிவுக்கு
வந்தேன்.

அந்த காலத்தில், இரண்டு விதமான எழுது குச்சிகள்
இருந்தன. ஒன்று மாக்குச்சி மற்றொன்று கல்குச்சி.
இந்த கல்குச்சி, ஏறக்குறைய சிலேட்டின்
வண்ணத்திலேயே இருக்கும். ஆணியால் எழுதினாலும்,
கல்குச்சியால் எழுதியது போலவே இருக்கும்.

வகுப்பறையின் மூலையில், பழைய இரும்பு பொருட்களை
எல்லாம் குவித்து வைத்திருந்தனர். அதிலிருந்து, ஒரு
ஆணியை எடுத்து, ஆசிரியை எழுதிப் போட்ட பாடத்தை
எழுதி, நன்றும் வாங்கி விட்டேன்.

என் கெட்ட நேரம், இன்னொரு பாடத்தை எழுதி போட்டு,
அதையும் சிலேட்டில் எழுதச் சொன்னார் ஆசிரியை.
ஆணியால் எழுதிய பாடமோ அழிய மறுத்தது.

ஆசிரியை எழுதி விட்டு போட்ட, சின்ன சின்ன, ‘சாக்பீஸ்’
துண்டுகளை பொறுக்கி, அடுத்த பாடத்தை எழுதினேன்.

ஆசிரியை ஒரு கணம், திருவள்ளுவர் படத்தையும்,
என்னையும் மாறி மாறி பார்த்து விட்டு, சிரித்தபடியே
, ‘உனக்கு என்ன பெரிய எழுத்தாளர்ன்னு நினைப்பா…’
என்று, என் காதை பிடித்து, செல்லமாக திருகினார்.

பின், அனைத்து மாணவர்களும் கேட்கும் விதமாக,
‘நம்ம சரவணராஜ் எதிர்காலத்துல பெரிய எழுத்தாளரா
வந்தாலும் வருவாண்டா…’ என்றார் சிரித்தபடியே.

அன்றைக்கு ஆசிரியை விளையாட்டாகச் சொன்னது,
இன்று என் வாழ்வில் பலிக்க துவங்கியுள்ளது. தற்போது,
ஐந்து நுால்களை வெளியிட்டு உள்ளேன்.

பெரும்பாலான இதழ்களில், என் படைப்புகள் வெளி
வந்துள்ளன. பிரபலமான கவிஞர்களால், என் தொகுப்புகள்
கொண்டாடப்பட்டுள்ளன.

ஆசிரியை வாக்கு அருள் வாக்கு!
–
—————————
– துஷ்யந்த் சரவணராஜ், தேவக்கோட்டை.
சிறுவர் மலர்