அதிவாசிகளுக்கு மதப் போதனை செய்ய முயன்று கொல்லப்பட்ட அமெரிக்க நாட்டவர்

by **Admin** Sun Nov 25, 2018 5:49 pm

நவீன நாகரிகம் நுழையாத தீவு ஒன்றில் ஆதிவாசிகளின் அம்பு தாக்கி கொல்லப்பட்ட அமெரிக்க மதப்போதகர் அந்த மக்களை கிறிஸ்தவத்திற்கு மதம் மாற்ற முயற்சித்த தகவல் தற்போது வெளியாகியுள்ளது.

27 வயதான ஜோன் அலன் சோ என்ற அந்த இளைஞன் இந்திய சமூத்திரத்தில் இருக்கும் தொலைதூர வடக்கு சென்டினல் தீவில் சட்டவிரோதமாக நுழைந்ததை அடுத்து கடந்த வாரம் தாக்குதலுக்கு உள்ளாகியுள்ளார். அவர் அன்பளிப்பாக மீன் மற்றும் கால்பந்துகளை எடுத்துக் கொண்டு தனது படகை அந்த தீவை நோக்கி செலுத்தி இருப்பதாக அவரது பயணம் பற்றி ஊடகங்கள் வெளியிட்டிருக்கும் தகவல்களில் குறிப்பிடப்பட்டுள்ளது.

“எனது பெயர் ஜோன். நான் உங்களை நேசிக்கிறேன் இயேசு உங்களை நேசிப்பார்.... இதோ மீன்கள்!” என்று அவர் சத்தம்போட்டுள்ளார்.

அப்போது அந்த ஆதிவாசிகள் அவர் மீது அம்புகளை எறிந்திருப்பதோடு அதில் ஒரு வில் அவர் எடுத்துச் சென்ற பைபிளில் பாய்ந்துள்ளது. இதனை அடுத்து அவர் மீனவர்களின் படகுக்கு திரும்பியுள்ளார். தனது அனுபவம் பற்றி அன்று இரவு எழுதி இருக்கும் அவர் அடுத்த நாள் மீண்டும் அந்த தீவுக்கு சென்றுள்ளார்.

பின்னர் அவர் மீண்டும் அங்கிருந்து திரும்பவில்லை.

இறப்பதற்கு முன், சமூக வலைத்தளத்தில் அவர் கூறியிருப்பதாவது,

“என் பெயர் ஜோன். நான் உங்களை நேசிக்கிறேன்் இயேசு உங்களை நேசிப்பார் என உரத்த குரலில் அவர்களிடம் தெரிவித்தேன். தீவில் இருந்த ஆதிவாசி சிறுவன் செலுத்திய ஒரு அம்பு எனது பைபிள் புத்தகத்தை துளைத்து விட்டது. எனது செயல்கள் பைத்தியகாரத்தனமாக இருக்கிறது என நீங்கள் நினைக்கலாம். ஆனால், பழங்குடியின மக்களிடம் இயேசுவை அறிமுகப்படுத்துவது சரியான செயல் என்றே நான் கருதுகிறேன்.

கடவுளே, நான் இறக்க விரும்பவில்லை. இது எனது கடைசி பதிவாக இருக்காது என நான் நம்புகிறேன். அப்படி இருந்தால், அது கடவுளின் மகிமையாகவே இருக்கும்” என இணைய தளத்தில் நவம்பர் 16ஆம் திகதி ஜோன் எழுதியுள்ளார். அதன் பின்னரே அந்த தீவை நோக்கி சென்றுள்ளார்.

வங்காள விரிகுடாவில் உள்ள வடக்கு சென்டினல் தீவில் சென்டிகல் மக்கள் வாழ்வதோடு அவர்கள் 150 பேர் மாத்திரமே இருப்பதாக நம்பப்படுகிறது. அவர்களது வாழ்க்கை முறையை பாதுகாக்க அந்த தீவுக்கு ஐந்து கிலோ மீற்றர் தூரம் வரை செல்ல வெளிநாட்டினர் மற்றும் இந்தியர்களுக்கு தடை விதிக்கப்பட்டுள்ளது.

குறிப்பாக வெளியுலகில் இருக்கும் நோய்களால் அவர்களுக்கு ஆபத்து என்பதால், அவர்களுடன் தொடர்பு வைத்துக் கொள்வது சட்டவிரோதமானதாகும்.

வெளியாட்கள் வருவதை எதிர்க்கும் இந்த ஆதிவாசிகள் 2006இல் அங்கு சென்ற இரு மீனவர்களை கொன்றனர். 2004 ஆம் ஆண்டு இந்திய சமுத்திரத்தில் ஏற்பட்ட சுனாமி அனர்த்தத்தின் சேதத்தை மதிப்பிட அந்த தீவுக்கு மேலால் பறந்த ஹெலிகொப்டர்கள் மீது அவர்கள் அம்பு எறிந்தனர்.

“நான் கொல்லப்பட்டால் அவர்கள் மீது அல்லது கடவுள் மீது கோபப்பட வேண்டாம்” என்று ஜோன் தனது பெற்றோர்களிடம் குறிப்பிட்டுள்ளார்.

ஆதிவாசிகள் அலனின் உடலை கடற்கரையில் புதைப்பதை மீனவர்கள் அடுத்த நாள் கண்டதாக சக மதப்போதகர் ஒருவர் அலனின் பேற்றோருக்கு எழுதி இருப்பதாக வொஷிங்டன் போஸ்ட் பத்திரிகை செய்தி வெளியிட்டுள்ளது.

ஜோனின் உடலை மீட்டுவருவதற்கு துறைசார் நிபுணர்கள், வன அதிகாரிகள் மற்றும் ஆதிவாசிகள் தொடர்பான தொண்டு அமைப்புகளின் உதவியை இந்திய பொலிஸார் நாடியுள்ளனர்.

அவர்களின் வாழ்விடத்திற்கு மற்றும் அவர்களுக்கு எந்த தொந்தரவும் இன்றி நாம் இதனை கையாள வேண்டியுள்ளது. இது அதிக கட்டுப்பாடு கொண்ட வலயம் இதற்கு சற்றுக் காலம் எடுத்துக் கொள்ளும்” என்று உள்ளுர் பொலிஸ் தலைவரான டிபென்திரா பதக் ஏ.எப்.பி. செய்தி நிறுவனத்திற்கு குறிப்பிட்டுள்ளார்.

thinakaran.