கவிதை கஃபே - முகம் ஒளிரச் சிரிக்கிறது பௌர்ணமி!

by **rammalar** Wed 27 Feb 2019 - 14:24

அழகிப் போட்டி

அழகிப் போட்டி
நடக்குமிடம் சென்றுவிடாதே
போட்டியின்றி தோற்றுவிடுவர்
அனைவரும்!

வெறுமை

காலி செய்யப்பட்ட வீடுகளில்
இட்டு நிரப்ப முடியாத மௌனத்தில்...
மெலிதாய்க் கேட்டுக்கொண்டே இருக்கிறது
ஓர் அலறல் சப்தம்!
- கோவை நா.கி.பிரசாத்

ஒடுங்குதல்

மரத்திலிருந்து
காற்று நீக்கிய
வேப்பம் பழச் சிதறலை
மிதித்து விளையாடும்
குழந்தைகளை,
ரசித்திருந்த காட்சியில்
எவரோ
கல்லெறிந்தது போலானது
வெளியில் போகாதே
என்ற வீட்டாரின் குரல்.
- ஆளுர். செ. கருணா, விசயபுரம்.

தவிப்பு

மொட்டைமாடியில்
நீ வற்றல் காயவைக்கையில்
அக்கம் பக்கம் பார்த்து
யாரும் அறியாவண்ணம்
சத்தமின்றி
சாதுர்யத்தோடு
மெதுமெதுவாய்
அருகே வந்து
எதிர்பாராத தருணத்தில்
வற்றலைக் கொத்திச் செல்ல
படபடத்துக் கொண்டிருக்கும்
காக்கையென இருக்கிறது
உன்னை
முத்தமிடத் தவிக்கும்
மனசு!
- சொ. சரவண பவா

அவசரம்

நீ - வாசல் தெளிக்க வரும் முன்பே
பூத்துவிட வேண்டுமென்று
அவரசப்பட்டே மலர்கிறது
தோட்டத்தின் பூசணி.
- ராம் பிரபு

யாரும் அழவில்லை

இத்தனை நாளும் இழுபறியாய்க்
கிடந்த பாட்டி இன்று போய்விட்டாள்
யாருமே அழவில்லை.
சமையலறைக்குச் சென்று
அம்மாவிடம் ஃபில்டர் காப்பி வாங்கி,
உறிஞ்சிக் கொண்டிருந்தார் தாத்தா.
வாசலில் விசிறியடித்த பேப்பரை
எடுத்து வந்து படித்துக்
கொண்டிருந்தார் அப்பா.
திருவிழா சமயத்தில்
இப்படி உயிரை விட்டுட்டாரே
சாமி புறப்பாடு நின்று போயிடுமே
தவித்தாள் அம்மா.
பத்து நாள் லீவு குஷியில்
துள்ளிக் கொண்டிருந்தான் அண்ணன்
நன் மட்டும் ஏன் அழணும்
டிவியை ஆன் செய்தேன்
அதுவும்,
போனால், போகட்டும் போடா
இந்தப் பூமியில் நிலையாய்
வாழ்ந்தவன் யாரடா? என்றது!
- இராமநாச்சியார்
-
------------------
நன்றி- கல்கி
& வாரமலர்