எள்ளுவய பூக்கலையே' பாடல் உருவான விதம்: ரகசியம் பகிரும் யுகபாரதி

வாழ்வுக்காக வீரச்சாவை அடைந்தவர்களே நாட்டார் 
தெய்வங்கள். அநீதிக்கு எதிராக முதல் கல்லை வீசத்
துணிந்த ஓர்ஆணோ பெண்ணோ அக்கிரமக்காரர்களால் 
கொல்லப்பட்டால், அவர்களை வழிபடுவதும் வணங்குவதும் 
தொல்குடி மரபு. 

நாட்டார் தெய்வங்கள் குறித்தும் வழக்காற்றியல் குறித்தும் 
பேராசிரியர் ஆ.சிவசுப்ரமணியன் மிக முக்கியமான ஆய்வுக் 
கட்டுரைளை எழுதியிருக்கிறார். 

அவை நூல்களாகவும் (தமிழரின் தாவர வழக்காறுகள்,
வரலாறும் வழக்காறும், நாட்டார் வழக்காற்றியல் அரசியல்) 
வந்துள்ளன.

நில அரசியலையும் குல அரசியலையும் தெரிந்துகொள்ள 
அவருடைய ஆய்வுகளும் கட்டுரைகளும் உதவுகின்றன. 
தொன்மத்தின் வழியே கட்டமைக்கப்பட்ட வரலாற்றை 
மறுக்கவும் மறுபரிசீலனைச் செய்யவும் இடமுண்டு. 

எனினும், அவற்றை மிகையென்று தள்ளிவிடமுடியாது. 
விதைகள், தாவரங்கள், விலங்குகள், பறவைகள் என 
அனைத்திற்கும் நம்முடைய பண்பாடு வழங்கியுள்ள இடத்தைப்
 புரிந்துகொள்வதன் மூலம் இயற்கையை விளங்கிக்கொள்ளலாம்.

அந்த வகையில் எள்ளும் ஆமணக்கும் முக்கியத்துவம் 
பெறுகின்றன. ஆமணக்கு எண்ணெய் குறித்த அயோத்திதாசப் 
பண்டிதரின் சித்திரிப்புகள் கவனத்துக்குரியவை. 

இப்பாடலை மண்மணம் மாறாமல் பாடிய ஜீ.வி.பிரகாஷூம் 
சைந்தவியும் நீடூழி வாழவேண்டும். நகரத்திலேயே வாழும் அவர்கள் 
தென்மாவட்ட மண்ணையும் மனிதர்களையும் இசையிலும் குரலிலும் 
கொண்டுவந்தது ஆச்சர்யமளிக்கிறது.

எனக்குப் பிடித்தமாதிரி எழுதிய வரிகளில் சிறு திருத்தமும் 
வெற்றிமாறன் கோரவில்லை. என்மீது அவர் வைத்த நம்பிக்கையை 
மக்களும் அங்கீகரித்திருக்கிறார்கள்.

சமூக ஊடகங்களில் இப்பாடலை பலரும் பாடிப் பதிவேற்றுவதைப் 
பார்க்கிறேன். அப்பாடலைப் பாடக்கூடிய பல குழந்தைகள்
 சாயலிலும் வயதிலும் என் மகளைப் போலவே இருக்கிறார்கள். 
எந்த நல்ல பாடலையும் அடையாளம் கண்டுவிடும் தமிழ் நிலத்தில் 
என் பாடல்கள் கேட்கப்படுவதைவிட, பாடப்படுவதையே 
பெருமையாகக் கருதுகிறேன்.

வெகுதூரத்தில் மட்டுமே தூவப்பட்ட எள் விதைகளை 
வீட்டுக்குள்ளும் இறைத்த நிம்மதி. தீண்டாமை, செடிகளுக்கும் 
கூடாதென்பதே என் குறிக்கோள். ஈழத் தமிழர்கள் மாவீரர் தினத்தன்று 
இதே பாடலைப் புதுவிதமாகப் படத்தொகுப்பு செய்து வெளியிட்டனர். 

வேலரசியலும் நூலரசியலும் தெரிந்த தமிழர்களுக்குப் பாட்டென்பது 
வெறும் பாட்டல்ல, பண்பாடு"

இவ்வாறு யுகபாரதி தெரிவித்துள்ளார்.

படம்- அசுரன்
பாடல் வரிகள்- யுகபாரதி
இசை- ஜி.வி.பிரகாஷ்
பாடியவர்- சைந்தவி
---------------
-
எள்ளு வய பூக்கலையே
ஏறெடுத்தும் பாக்கலையே
ஆலால ஒன் சிரிப்பு கொத்துதய்யா
அச்சறுந்த ராட்டினம் போல சுத்துதய்யா

கொல்லையில வாழ எல
கொட்டடியில் கோழி குஞ்சு
அத்தனையும் உன் மொகத்த சொல்லுதய்யா
ஆடும் மாடும் வெறும் வாய மெள்ளுதய்யா

காத்தோட உன் வாசம்
காடெல்லாம் ஒம் பாசம்

ஊத்தாட்டம் ஒன் நெனப்பே ஊறுதய்யா
சால்சாப்பு வேணாம் வந்து நில்லய்யா
சாவையும் கூறு போட்டு கொல்லய்யா

கல்லாக நின்னாயோ
கால் நோக நின்னாயோ
கண்ணே நீ திரும்பி வரணும் வீட்டுக்கு

மல்லாந்து போனாலும்
மண்ணோடு சாஞ்சாலும்
அய்யா நீ பெருமை சாதி சனத்துக்கு

தலைச்சம் புள்ளை இல்லாம
சரிஞ்சது எத்தன ஆட்சி
நீயே எங்க ராசா வா வா களத்துக்கு
தாயோட பாரம் மாசம் பத்தய்யா
தாங்காம நீயும் போனா தப்பய்யா

எள்ளு வய பூக்கலையே
ஏறெடுத்தும் பாக்கலையே
ஆலால ஒன் சிரிப்பு கொத்துதய்யா
அச்சறுந்த ராட்டினம் போல சுத்துதய்யா


வாள் ஏந்தி வந்தாலும்
வாழாம செத்தாலும்
கம்பீரம் கொறைஞ்சிடாத
நெருப்பு நீ

அய்யோன்னு போனாலும்
ஆகாசம் போனாலும்
தண்ணீர கொளத்தில் சேர்க்கும்
வரப்பு நீ

உழைக்க எண்ணுற ஆள
உதைச்சி தள்ளுற ஊர
கைய கால வெட்டி வீசும்
கருப்பு நீ

காட்டேரி உன்னை கண்டா ஓடாதோ
காப்பாத்த தெய்வம் வந்து சேராதோ

எள்ளு வய பூக்கலையே
ஏறெடுத்தும் பாக்கலையே
ஆலால ஒன் சிரிப்பு கொத்துதய்யா
அச்சறுந்த ராட்டினம் போல சுத்துதய்யா

கொல்லையில வாழ எல
கொட்டடியில் கோழி குஞ்சு
அத்தனையும் உன் மொகத்த சொல்லுதய்யா
ஆடும் மாடும் வெறும் வாய மெள்ளுதய்யா

காத்தோட உன் வாசம்
காடெல்லாம் ஒம் பாசம்

ஊத்தாட்டம் ஒன் நெனப்பே ஊறுதய்யா
சால்சாப்பு வேணாம் வந்து நில்லய்யா
சாவையும் கூறு போட்டு கொல்லய்யா

நன்றி-இணையம்