கடாபியின் மனைவி, குழந்தைகளுக்கு எதிராக பொருளாதார தடை விதித்தது அமெரிக்கா

வாஷிங்டன் : லிபியா தலைவர் கடாபியின் மனைவி மற்றும் குழந்தைகளுக்கு எதிராகவும் அமெரிக்க அரசு பொருளாதார தடைகளை விதித்துள்ளது. " கடாபிக்கு எதிரான நடவடிக்கைகள் தீவிரப் படுத்தப்பட்டுள்ளன' என்றும், அமெரிக்க அதிபர் ஒபாமா தெரிவித்துள்ளார்.
லிபியா தலைவர் கடாபியை, பதவியில் இருந்து அகற்றுவதற்காக அந்த நாட்டு மக்கள், கடந்த ஒரு மாதமாக போராட்டம் நடத்தி வருகின்றனர். போராட்டக்காரர்களை, கடாபி ஆதரவு ராணுவம் போர் விமானங்கள் மூலமாக குண்டு வீச்சு நடத்தி, கொலை செய்து வருகிறது. இதற்கு சர்வதேச நாடுகள் கண்டனம் தெரிவித்துள்ளன. போராட்டம் நடத்தியதற்காக, சொந்த நாட்டு மக்களையே கொன்று குவித்து வரும் கடாபியை கண்டித்து, அவருக்கு எதிராக அமெரிக்க அரசு, ஏற்கனவே பொருளாதார தடைகளை விதித்துள்ளது. அமெரிக்கா உள்ளிட்ட பிற நாடுகளில் இருக்கும் அவரது சொத்துக்கள், வங்கி கணக்குகள் முடக்கி வைக்கப்பட்டுள்ளன.
அடுத்தகட்டமாக, தற்போது கடாபியின் மனைவி மற்றும் குழந்தைகளுக்கு எதிராகவும், அமெரிக்க அரசு பொருளாதார தடைகளை விதித்துள்ளது. இதன்படி, கடாபியின் மனைவி மற்றும் குழந்தைகளுக்கு சொந்தமாக அமெரிக்கா உள்ளிட்ட நாடுகளில் இருக்கும் சொத்துக்கள், வங்கி கணக்குகள் முடக்கி வைக்கப்படும். மேலும், அமெரிக்க நாட்டைச் சேர்ந்த எவரும், இவர்களுடன் இணைந்து, எந்தவிதமான வர்த்தக நடவடிக்கைகளிலும் ஈடுபட முடியாது.
இதற்கிடையே, சொந்த நாட்டு மக்களை கொன்று குவிக்கும் கடாபியை, அமெரிக்க அதிபர் ஒபாமா கடுமையாக எச்சரித்துள்ளார். அவர் கூறுகையில்," கடாபிக்கு எதிரான நடவடிக்கைகள் தீவிரப் படுத்தப்பட்டுள்ளன. படிப்படியாக, அவருக்கு எதிரான பிடி இறுகி வருகிறது. கடாபிக்கு எதிராக போராடி வரும் நிர்வாக அமைப்புக்கு அங்கீகாரம் அளிக்கும் வகையில், அமெரிக்கா சார்பில் தூதர் நியமிக்கப்படுவார். தனது கடுமையான நடவடிக்கைகளால், சர்வதேச நாடுகளில் இருந்து, கடாபி தனிமைப் படுத்தப்பட்டு வருகிறார், ருவாண்டாவில் பொதுமக்கள் கொன்று குவிக்கப்பட்ட சம்பவம் போல், மீண்டும் ஒரு சம்பவம் நடந்து விடக் கூடாது' என்றார்.