வாழ்க்கைக்கே முற்றுப்புள்ளி!

by **rammalar** Thu 27 Jun 2024 - 8:57

---
பொய்யும் புரட்டும்
பொங்கியெழும் இடமெல்லாம்
உண்மையும், சத்தியமும்
வேரோடு சரிந்து
சோதனைகளாக வந்து குவியும்!
-
தொழில் வளம் பெருகும்
இடமெல்லாம்
வருமானம் கொழித்து
வாழ்க்கை தரம்
ஆல மரம் போல
உயர்ந்து நிற்கும்!
-
கற்றல் திறன்
மிகுந்த இடமெல்லாம்
அறிவும், அனுபவமும்
அளவில்லாமல் வளர்ந்து
பணிவும், பண்பும்
வளர்ச்சி கொடுக்க
துணை நிற்கும்!
-
மரங்களை வளர்த்த
இடங்களில் எல்லாம்
மேகங்கள் ஒன்று திரண்டு
மழை பொழிவை அதிகரிக்கும்!
-
மதிப்பும், மரியாதையும்
மேலோங்கும் இடமெல்லாம்
நல்லுறவு பூத்துக்குலுங்கி
ஒற்றுமை வலிமை பெறும்!
-
அவசியமற்ற வார்த்தைகள்
அள்ளி வீசப்படும் இடமெல்லாம்
அமைதி சீர்குலைந்து
பிரிவினை எட்டிப் பார்க்கும்!
-
அநீதியும், அட்டூழியங்களும்
கைகோர்க்கும் இடமெல்லாம்
நிம்மதி சுக்குநுாறாகி
வேதனை எனும் தீ
வாழ்க்கையை சுட்டெரிக்கும்!
-
உழைப்புக்கு முற்றுப்புள்ளி
வைக்கும் இடமெல்லாம்
பிழைப்புக்கு வழியின்றி
வறுமை நோய் வாட்டி வதைத்து
வாழ்க்கைக்கே முற்றுப்புள்ளி
வைத்து விடும்!
----------------
— எல்.மூர்த்தி, கோவை.
நன்றி-வாரமலர்