சாம்பல் கயிறு.

by **ஹம்னா** Mon 25 Apr 2011 - 19:48

வாசுவும், வள்ளியும் அண்ணன் தங்கை. இருவரும் அதிபுத்திசாலிகள். அவர்களின் அறிவுக்கூர்மையை பலரும் புகழ்ந்தார்கள். அந்நாட்டு ராஜா, வாசுவின் மீதும் வள்ளியின் மீதும் பொறாமைக் கொண்டான். அறிவில் அவர்களை வெல்வதற்கு பலமுறை முயன்றான். ஒவ்வொரு முறையும் அவன் தோற்றுத்தான் போனான். அவர்கள் மீது வன்மம் கொண்ட ராஜா, அவர்களைத் தோற்கடிப்பதற்காக சந்தர்ப்பம் பார்த்துக் கொண்டிருந்தான்.

ஒருநாள் மந்திரி, ராஜாவிற்கு ஒரு தந்திரத்தைச் சொல்லிக்கொடுத்தான். வாசுவையும், வள்ளியையும் தோற்கடிப்பதற்கான வழிதான் அது. அதைக்கேட்டு ராஜா மகிழ்ச்சியடைந்தான். ""இந்த முறை அந்தப் பொடிசுகளைத் தோற்கடித்துவிட முடியும்'' என்று ராஜா மனதிற்குள் சொல்லிக்கொண்டான். உடனே அவன், வாசுவையும், வள்ளியையும் அழைத்து வரச் செய்தான். அவர்கள் வந்து வணக்கம் தெரிவித்தார்கள். ராஜா சொன்னான்:

""உங்களுக்கு நான் இப்போது ஒரு போட்டி வைக்கப் போகிறேன். அதில் நீங்கள் வென்றுவிட்டால், நீங்கள் உண்மையிலேயே அறிவாளிகள்தான் என்று ஏற்றுக்கொள்கிறேன். இன்று இரவுக்குள் நீங்கள் சாம்பலால் ஒரு கயிறு செய்ய வேண்டும். இதுதான் உங்களுக்கு நான் வைக்கும் போட்டி.''

அவர்கள் இருவரும் புரியாமல் கேட்டார்கள்: ""என்ன அரசே, சாம்பல் கயிறா? அப்படி ஒன்றை நாங்கள் கேள்விப்பட்டதே இல்லையே!''

""நீங்கள் கேள்விப்பட்டிருக்கிறீர்களா இல்லையா என்பது பற்றியெல்லாம் எனக்குக் கவலை இல்லை. இன்று இரவுக்குள் நீங்கள் சாம்பல் கயிறு செய்ய வேண்டும். இதுதான் என் கட்டளை. நான் சொன்னபடி நீங்கள் செய்யவில்லை என்றால் உங்களை நாடு கடத்திவிடுவேன், ஜாக்கிரதை!'' என்றான் ராஜா.

வாசுவும், வள்ளியும் துயரத்துடன் வீடு திரும்பினார்கள். இரவு முழுதும் யோசித்தார்கள். கடைசியில் அவர்களுக்கு ஒரு வழி தெரிந்தது. இரவோடு இரவாக ஒரு சாம்பல் கயிறு தயாரித்தார்கள். காலையில் வந்து பார்த்த ராஜா, இந்த முறையும் தான் தோற்றதை எண்ணி வெட்கித் தலைகுனிந்தான்.

வாசுவும், வள்ளியும் எப்படி வெற்றி பெற்றார்கள் என்று உங்களுக்குத் தெரிகிறதா?

வாசுவும், வள்ளியும் நிறைய வைக்கோலைக் கொண்டுவந்து, மிக நீண்ட கயிறு ஒன்றைத் திரித்தார்கள். அதைத் தங்கள் வீட்டு வாசல் தரையில் நீளமாக வைத்தார்கள். பிறகு கயிறின் முனைகளைப் பற்ற வைத்தார்கள். வைக்கோல் மெதுவாக எரிந்து முடியும்போது அங்கே ஒரு சாம்பல் கயிறு தோன்றியிருந்தது.