தாவர உணவுகளை மட்டும் உண்ணும் சிலந்தியினம் கண்டுபிடிப்பு

by **நேசமுடன் ஹாசிம்** Fri 29 Apr 2011 - 11:17

தாவர இனங்களை மட்டும் உணவாக எடுத்துக் கொள்ளும் சிலந்தி வகை ஒன்றை அறிவியலாளர்கள் தற்போது கண்டுபிடித்துள்ளனர்.
பகீரா கிப்லிங்கி(Bagheera kiplingi) எனப்படும் இவ்வகை சிலந்திகள் நடு அமெரிக்காவிலும், மெக்சிக்கோவிலும் வாழ்ந்து வருகின்றன. இவையே சிலந்தி வகைகளில் தாவர உணவை மட்டும் உண்பவை.

இதுவரை கண்டறியப்பட்ட கிட்டத்தட்ட 40,000 சிலந்தி வகைகள் அனைத்தும் ஊனுண்ணி வகைகளாகும். இது குறித்த ஆய்வுக் கட்டுரை நடப்பு உயிரியல் என்ற அறிவியல் இதழில் வெளியிடப்பட்டுள்ளது.

ஐக்கிய அமெரிக்காவின் பென்சில்வேனியாவின் விலனோவா பல்கலைகழத்தைச் சேர்ந்த பேராசிரியர் ராபர்ட் கறி என்பவரின் தலைமையில் இவ்வாய்வுகள் மேற்கொள்ளப்பட்டன.

பாயும் சிலந்தி தேள் வகுப்பைச் சேர்ந்த இவை 5-6 மில்லி மீற்றர் நீளமானவை. புரதங்கள் நிறைந்த அக்காசியா வகைத் தாவரங்களின் குருத்துக்களையே இவை பெரும்பாலும் உண்கின்றன.

இவ்வகை சிலந்திகளின் ஊனுண்ணாமை முதற் தடவையாக கொஸ்டா ரிக்காவில் 2001ஆம் ஆண்டில் எரிக் ஒல்சென் என்பவரால் கண்டுபிடிக்கப்பட்டது. பின்னர் 2007ஆம் ஆண்டில் கிறிஸ்டோபர் மீகன் என்பவரால் ஆய்வுகள் மேற்கொள்ளப்பட்டது.

அதன் பின்னர் தற்போது பேராசிரியர் கறியின் தலைமையில் ஆய்வுகள் மேற்கொள்ளப்பட்டு முடிவுகள் வெளியிடப்பட்டுள்ளன. இது குறித்துக் கருத்து தெரிவித்த கறி,"தாவரங்களை மட்டுமே தேடிச் செல்லும் சிலந்தி உலகில் இதுவொன்றே" எனத் தெரிவித்தார். இவை பாயும் சிலந்திகளாதலால் தமது உணவுக்காக வலைகளைப் பின்ன வேண்டிய அவசியம் இல்லை.