ஏற்கனவே 13 பெண்களை கொன்ற கொடூரன் 10 நாளில் மேலும் 6 பெண்கள் படுகொலை

by **நேசமுடன் ஹாசிம்** Sun 1 May 2011 - 19:36

கோவை: கோவை உட்பட பல்வேறு இடங்களில் 19 பெண்களை பாலியல் பலாத்காரம் செய்து கொன்ற காமக்கொடூரனை பிடிக்க முடியாமல் 2 மாநில போலீசாரும் திணறி வருகின்றனர்.
திருப்பூர் அருகே பெருமாநல்லூரில் பெண் போலீஸ் ஜெயமணி(39)யை பாலியல் பலாத்காரம் செய்து கொலை செய்த வழக்கில் சேலம் மாவட்டத்தை சேர்ந்த ஜெய்சங்கர்(39) என்பவர் கைது செய்யப்பட்டார். விசாரணையில், சேலம், நாமக்கல், தருமபுரி, கிருஷ்ணகிரி, திருச்சி ஆகிய மாவட்டங்களில் 9 பெண்களை பாலியல் பலாத்காரம் செய்து கொன்றது தெரியவந்தது.
இதையடுத்து, கோவை மத்திய சிறையில் அடைக்கப்பட்டிருந்த இவரை, பல்வேறு நீதிமன்றங்களுக்கு போலீசார் விசாரணைக்கு அழைத்துச் சென்றனர். கடந்த மார்ச் 18ம் தேதி நீதிமன்ற விசாரணை முடிந்து கோவைக்கு திரும்பிக் கொண்டிருந்தபோது இவர், போலீசாரை ஏமாற்றி தப்பிவிட்டார்.
இதற்கு பின்பு, கர்நாடகா மாநிலம் பெல்லாரி மாவட்டம் மைசூர்&பெல்காம் தேசிய நெடுஞ்சாலையில் 4 இடங்களில் 4 பெண்கள் பாலியல் பலாத்காரம் செய்யப்பட்டு, கொடூரமான முறையில் கொலை செய்யப்பட்டனர். கொல்லப்பட்டவர்கள் கால்நடைகளை மேய்ந்தவர்கள். இந்த கொலைகளை ஜெய்சங்கர்தான் செய்துள்ளார் என கர்நாடக போலீஸ் விசாரணையில் தெரியவந்தது. ஜெய்சங்கரை பிடிக்க தனிப்படை அமைக்கப்பட்டது.
இந்நிலையில், 10 நாளில் கர்நாடக மாநிலத்தில் மேலும் 8 கொலைகள் நடந்துள்ளதாக திடுக்கிடும் தகவல் வெளியாகி உள்ளது. இதில், 2 பேர் ஆண்கள், 6 பேர் பெண்கள். பெண்கள் அனைவரும் பாலியல் பலாத்காரம் செய்து கொலை செய்யப்பட்டுள்ளனர். இதையும் ஜெய்சங்கர்தான் செய்துள்ளது தெரியவந்துள்ளது.
இது குறித்து கோவை போலீஸ் கமிஷனர் சைலேந்திரபாபு கூறுகையில், ‘‘ஜெய்சங்கர் தொடர்ந்து பெண்களை கொடூரமான முறையில் பலாத்காரம் மற்றும் கொலை செய்து வருகிறான். அவனை தனிப்படை போலீசார் விரைவில் பிடித்துவிடுவார்கள். மொத்தம் 21 கொலைகளை செய்த ஜெய்சங்கர், இருக்கும் இடம் தெரியவந்துள்ளது’’ என்றார்.