ஹாட்ரிக் வெற்றி பெறுமா கொல்கத்தா: இன்று டெக்கன் சார்ஜர்ஸ் அணியுடன் மோதல்

ஐ.பி.எல். தொடரில் இன்று நடக்கவுள்ள லீக் போட்டியில் டெக்கன் சார்ஜர்ஸ், கொல்கத்தா நைட்ரைடர்ஸ் அணிகள் மோதுகின்றன.
இதில் அபார ஆட்டத்தை வெளிப்படுத்தி சமீபத்தில் கொல்கத்தா அணிக்கு எதிராக கண்ட தோல்விக்கு பதிலடி கொடுக்க சங்ககர அணி காத்திருக்கிறது.

நான்காவது ஐ.பி.எல். "டுவென்டி 20" கிரிக்கட் தொடர் நாட்டின் முக்கிய நகரங்களில் நடக்கிறது. இன்று ஐதராபாத்தில் நடக்கவுள்ள லீக் போட்டியில் சங்ககர தலைமையிலான டெக்கன் சார்ஜர்ஸ் அணி, காம்பிர் வழி நடத்தும் கொல்கத்தா நைட்ரைடர்ஸ் அணியை எதிர்கொள்கிறது.

டெக்கன் அணி இதுவரை விளையாடிய எட்டு போட்டிகளில் மூன்றில் மட்டுமே வெற்றி கண்டது. எனவே அடுத்த சுற்றுக்கு முன்னேற இனிவரும் போட்டிகளில் வெற்றி பெற வேண்டிய கட்டாயம் டெக்கன் அணிக்கு ஏற்பட்டுள்ளது. சமீபத்தில் கொல்கத்தா அணிக்கு எதிரான போட்டியில் டெக்கன் அணி 9 ரன்கள் வித்தியாசத்தில் தோல்வி அடைந்தது. இதற்கு பதிலடி கொடுக்க டெக்கன் அணிக்கு நல்ல வாய்ப்பு ஏற்பட்டுள்ளது.

சென்னை அணிக்கு எதிராக அபார ஆட்டத்தை வெளிப்படுத்திய சன்னி சோகல், இன்றும் நல்ல துவக்கம் அளிக்கலாம். இவருக்கு ஷிகர் தவான், பாரத் சிப்லி உள்ளிட்ட "டாப் ஆர்டர்" துடுப்பாட்டகாரர்க்ள் ஒத்துழைப்பு அளித்தால் நல்லது. "மிடில் ஆர்டரில்" கப்டன் சங்ககர, கேமிரான் ஒயிட், டுமினி, கிறிஸ்டியன் உள்ளிட்டோர் அதிரடி காட்டும் பட்சத்தில் இமாலய இலக்கை பதிவு செய்யலாம்.

சென்னை அணிக்கு எதிராக சுழலில் அசத்திய பிரக்யான் ஓஜா இன்றும் கைகொடுக்கலம். இவருக்கு அமித் மிஸ்ரா, டுமினி உள்ளிட்டோர் ஒத்துழைப்பு கொடுக்கும் பட்சத்தில் விக்கெட் வேட்டை நடத்தலாம். சென்னை அணிக்கு எதிராக வேகத்தில் சொதப்பிய இஷாந்த் சர்மா இன்று எழுச்சி பெறுவார் என எதிர்பார்க்கப்படுகிறது. ஸ்டைன், கோனி, கிறிஸ்டியன், ஹர்மீத் சிங் உள்ளிட்ட வேகங்கள் சாதிக்கும் பட்சத்தில் சுலப வெற்றி பெறலாம்.

கொல்கத்தா அணி இதுவரை விளையாடியுள்ள எட்டு போட்டிகளில் ஐந்தில் வெற்றி கண்டது. கடைசியாக டெல்லி, பஞ்சாப் அணிகளை வீழ்த்தியுள்ள கொல்கத்தா அணி இன்று டெக்கன் அணியை பதம்பார்க்கும் பட்சத்தில் இரண்டாவது முறையாக "ஹாட்ரிக்" வெற்றியை ருசிக்கலாம்.

கொல்கத்தா அணியின் துடுப்பாட்ட வரிசை பலமாக உள்ளது. இதுவரை எட்டு போட்டிகளில் 245 ரன்கள் எடுத்துள்ள காலிஸ் கடந்த சில போட்டிகளில் பெரிய அளவில் சாதிக்கவில்லை. எனவே இவர் இன்று எழுச்சி பெறும் பட்சத்தில் ரன் வேட்டை நடத்தலாம். கப்டன் காம்பிர், மனோஜ் திவாரி உள்ளிட்டோர் நல்ல "பார்மில்" இருப்பது துடுப்பாட்டத்தில் பலம் சேர்க்கிறது. இருப்பினும் "மிடில் ஆர்டரில்" இயான் மார்கன், யூசுப் பதான், சாகிப் அல் ஹசன், டசாட்டே உள்ளிட்டோர் அதிரடியாக ரன் சேர்க்கும் பட்சத்தில் வலுவான இலக்கை பதிவு செய்யலாம். காயம் காரணமாக பிராட் ஹாடின் வெளியேறியதை அடுத்து மார்க் பவுச்சர் இன்று களமிறக்கப்படலாம்.

கொல்கத்தா அணியின் வேகப்பந்துவீச்சில் பிரட் லீ பலம் சேர்க்கிறார். இவர் விக்கெட் வீழ்த்துவதில் கவனம் செலுத்தினால் நல்லது. இவருக்கு பாலாஜி, டசாட்டே, காலிஸ், உனத்கட், ரஜத் பட்டியா உள்ளிட்டோர் ஒத்துழைப்பு அளிக்கும் பட்சத்தில் எதிரணியின் ரன் வேட்டையை தடுக்கலாம். சுழலில் இக்பால் அப்துல்லா நம்பிக்கை அளிக்கிறார். இவருடன் யூசுப் பதான், சாகிப் அல் ஹசன் துல்லியமாக பந்துவீசும் பட்சத்தில் சுலப வெற்றி பெறலாம்.

ஐ.பி.எல். அரங்கில் டெக்கன் சார்ஜர்ஸ் - கொல்கத்தா நைட்ரைடர்ஸ் அணிகள் எட்டாவது முறையாக மோத உள்ளன. முன்னதாக மோதிய ஏழு போட்டிகளில் கொல்கத்தா 5, டெக்கன் 2 ல் வெற்றி கண்டன.

:!+: :”@: