17 ரன் வித்தியாசத்தில் அபார வெற்றி பெற்றது கொல்கத்தா அணி

by **நேசமுடன் ஹாசிம்** Fri 29 Apr 2011 - 9:10

டெல்லியில் வியாழக்கிழமை நடைபெற்ற ஐ.பி.எல் லீக் ஆட்டத்தில கொல்கத்தா அணி 17 ரன்கள் வித்தியாசத்தில் டெல்லியை வீழ்த்தியது.
7 ஆட்டங்களில் விளையாடியுள்ள டெல்லி ஐந்தில் தோல்விகளைச் சந்தித்து தோல்வியில் இருந்து மீள முடியாமல் தவித்து வருகிறது. முதலில் ஆடிய கொல்கத்தா நைட் ரைடர்ஸ் 20 ஓவர்களில் 7 விக்கெட் இழப்புக்கு 148 ரன்கள் குவித்தது. பின்னர் ஆடிய டெல்லி டேர்டெவில்ஸ் 20 ஓவர்களில் 9 விக்கெட் இழப்புக்கு 131 ரன்கள் மட்டுமே எடுத்து தோல்வி கண்டது.

முன்னதாக டொஸ் வென்ற டெல்லி கப்டன் சேவாக் களத்தடுப்பை தெரிவு செய்தார். இதையடுத்து முதலில் துடுப்பெடுத்தாடிய கொல்கத்தா அணியில் காலிஸ் 11, கோஸ்வாமி 22, கம்பீர் 18 என வேகமாக வெளியேறினார்.

இருப்பினும் பின்னர் வந்த திவாரி தனி நபராக நின்று டெல்லி பந்துவீச்சாளர்களை பதம் பார்த்தார். 47 பந்துகளைச் சந்தித்த திவாரி ஆட்டமிழக்காமல் 3 சிக்ஸர்கள், 2 பவுண்டரிகளுடன் 61 ரன்கள் விளாச 20 ஓவர்களில் 7 விக்கெட் இழப்புக்கு கொல்கத்தா 148 ரன்கள் எடுத்தது.

பின்னர் ஆடிய டெல்லி அணியில் வார்னர் 2 ரன்களில் பாலாஜி பந்துவீச்சில் போல்டு ஆனார். 23 பந்துகளைச் சந்தித்த சேவாக் 1 சிக்ஸர், 5 பவுண்டரிகளுடன் 34 ரன்கள் எடுத்து வெளியேறினார். கடைசி 2 ஓவர்களில் 26 ரன்கள் எடுத்தால் வெற்றி என்ற நிலை டெல்லிக்கு ஏற்பட்டது.

19வது ஓவரை வீச வந்த பிரெட் லீ இரண்டாவது பந்தில் மிக அற்புதமாக வேணுகோபாலை ரன் அவுட் ஆக்கினார். இறுதியில் டெல்லி அணி 9 விக்கெட் இழப்புக்கு 131 ரன்கள் எடுத்து தோல்வி 17 ரன்களில் தோல்வி கண்டது. திவாரி ஆட்டநாயகனாகத் தெரிவு செய்யப்பட்டார்.