அரச துறையில் 30,000 பேருக்கு தொழில்வாய்ப்பு

by **நேசமுடன் ஹாசிம்** Fri 13 May 2011 - 10:19

அரச துறையில் 30 ஆயிரம் பேருக்கு புதிதாக நியமனம் வழங்க அரசாங்கம் தீர்மானித் துள்ளதாக அமைச்சரவை பேச்சா ளர் அமைச்சர் கெஹலிய ரம்புக்வெல்ல கூறினார். இதன் படி, 15 ஆயிரம் பட்டதாரிகளும் க. பொ. த. சாதாரண தரப் பரீட்சையில் சித்தியடைந்த 15 ஆயிரம் பேரும் புதிதாக நியமிக்கப்பட உள்ளதாகவும் அவர் குறிப்பிட்டார்.

அமைச்சரவை முடிவுகளை அறிவிக்கும் ஊடகவியலாளர் மாநாடு நேற்று அரசாங்க தகவல் திணைக்களத்தில் நடைபெற்றது.

இங்கு கருத்துத் தெரிவித்த அமைச்சர் கெஹலிய ரம்புக்வெல்ல:

ஜனாதிபதி மஹிந்த ராஜபக்ஷ இது தொடர்பான அமைச்சரவைப் பத்திரத்தை சமர்ப்பித்திருந்தார். இதன் பிரகாரம், இலங்கை அபிவிருத்தி அதிகாரிகள் சேவை மற்றும் இலங்கை அபிவிருத்தி உதவியாளர் சேவை என இரு புதிய சேவைகள் புதிதாக ஸ்தாபிக்க தீர்மானிக்கப்பட்டுள்ளது.

அரசாங்கம் நாடளாவிய ரீதியில் பல்வேறு அபிவிருத்தித் திட்டங்களை முன்னெடுத்து வருகிறது. இந்தத் திட்டங்களுக்கு உதவுவதற்காகவே புதிதாக 30 ஆயிரம் பேர் நியமிக்கப்பட உள்ளனர்.

ஜனாதிபதி மஹிந்த ராஜபக்ஷ ஏற்கெனவே உறுதியளித்திருந்ததின்படி; அரச துறையில் புதிய இரு சேவைகள் உருவாக்கப்படுகின்றன. இதற்கு எதிர்வரும் நாட்களில் பட்டதாரிகளும் க பொ. த. சாதாரண தரப் பரீட்சையில் தோற்றி உயர்தரத்திற்கு தோற்றியவர்களும் நியமிக்கப்படுவர்.

எதிர்வரும் ஓகஸ்ட் மாதம் முதலாம் திகதி முதல் இரு சேவைகளுக்கும் பட்டதாரிகளும் உயர்தரத்திற்கு தகுதி பெற்றவர்களும் நியமிக்கப்படவுள்ளனர். இதற்காக எதிர்வரும் நாட்களில் உரிய அடிப்படையில் விண்ணப்பங்கள் கோரப்பட்டு தகுதியானவர்கள் தெரிவு செய்யப்படுவர். இவர்கள் நாட்டின் பல்வேறு பகுதிகளுக்கு நியமிக்கப்பட உள்ளனர்.

இதேவேளை, அரசாங்கம் இதற்கு முன்னர் 50 ஆயிரத்திற்கும் அதிகமான பட்டதாரிகளுக்கு அரச துறையில் நியமனம் வழங்கியது. இவர்களின் பதவி உயர்வு, இடமாற்றம் உட்பட பல்வேறு சேவை பிரச்சினைகளை தீர்ப்பதில் சிக்கல் ஏற்பட்டிருந்தது. எனவே பட்டதாரிகளின் சேவைப் பிரச்சினைகளை தீர்ப்பதற்காக புதிய சுற்று நிருபமொன்றை வெளியிடுவதற்கு அமைச்சரவை அனுமதி வழங்கியுள்ளது. இது தொடர்பான அமைச்சரவைப் பத்திரத்தை பொது நிர்வாக அமைச்சர் ஜோன் செனவிரத்ன சமர்ப்பித்திருந்தார்.