ஈரான் உதவியுடன் இலங்கையில் சேலைன் உற்பத்தி தொழிற்சாலை

by **நேசமுடன் ஹாசிம்** Fri 13 May 2011 - 10:33

வருடாந்தம்
u 83 இலட்சம் போத்தல்கள் கொள்வனவு
u 41 கோடி ரூபா செலவு

இலங்கையில் முதலாவது சேலைன் மருந்து உற்பத்தி தொழிற்சாலை ஈரான் இஸ்லாமிய குடியரசின் ஒத்துழைப்போடு நிர்மாணிக்கப்படவிருக்கின்றது-

இலங்கை அரசாங்க ஆஸ்பத்திரிகளுக்கு தேவையான சேலைன் மருந்துப் பொருட்களை உள்நாட்டிலேயே உற்பத்தி செய்து கொள்ளும் நோக்கிலேயே இத்தொழிற்சாலை அமைக்கப்படவிருப்பதாக சுகாதார அமைச்சின் அதிகாரியொருவர் நேற்று தெரிவித்தார்.

சுகாதார அமைச்சர் மைத்திரிபால சிறிசேனவை கொழும்பில் நேற்று முன்தினம் சந்தித்துப் பேச்சுவார்த்தை நடத்திய ஈரானின் இலங்கைத் தூதுவர் மஹ்மூத் ரஹீமி கொரூஜி இலங்கையில் சேலைன் மருந்து போத்தல் உற்பத்தி தொழிற்சாலையை நிர்மாணிப்பதற்கு பூரண ஒத்துழைப்பு நல்கப்படும் என்று உறுதியளித்தார்.

ஈரானிய தூதுவரின் அறிவிப்பை சுகாதார அமைச்சர் மைத்திரிபால சிறி சேன பெரிதும் வரவேற்றுப் பாராட்டினார்.

இலங்கை அரசாங்க ஆஸ்பத்திரிகளின் பாவனைக்கென வருடாந்தம் 83 இலட்சத்து 26 ஆயிரத்து 535 சேலைன் போத்தல்கள் கொள்வனவு செய்யப்படுகின்றன. இதற்கென 40 கோடியே 50 இலட்சம் ரூபா செலவிடப்படுவதாக சுகாதார அமைச்சர் இச் சமயம் சுட்டிக்காட்டினார்.

தற்போது இலங்கை அரசாங்க ஆஸ்பத்திரிகளுக்குத் தேவையான சகல சேலைன் மருந்து போத்தல்களும் வெளிநாடுகளிலிருந்துதான் இறக்குமதி செய்யப்படுகின்றன. இதற்கென பெருந்தொகை நிதியும் செலவிடப்படுகின்றது. அப்படி இருந்தும் சில சமயங்களில் இம்மருந்து போத்தல்கள் உரிய காலவேளையில் கிடைக்காதிருப்ப தாகவும் இங்கு அமைச்சர் கூறினார்.

இவ்வாறான நிலையில் இலங்கையில் சேலைன் மருந்து போத்தல் தொழிற்சாலையை நிர்மாணிப்பதற்கு உதவ முன் வந்திருப்பது பெரிதும் வரவேற்கத் தக்கது எனவும் அமைச்சர் குறிப்பிட்டார்.

இச்சந்திப்பின் போது ஈரானிலிருந்து மருந்துப் பொருட்களை கொள்வனவு செய்வது குறித்தும் கவனம் செலுத்தப்பட்டது.

இச்சந்திப்பின் போது கருத்துத் தெரிவித்த ஈரான் தூதுவர் கொரூஜி இலங்கைக்கும் ஈரானுக்குமிடையில் நீண்ட காலமாக நட்புறவு நிலவுகின்றது. என்றாலும் ஜனாதிபதி மஹிந்த ராஜபக்ஷ அவர்கள் இந்நாட்டின் ஜனாதிபதியாகப் பதவி ஏற்றது முதல் இவ்வுறவு மேலும் மேலும் வலுவடைந்துள்ளது. இலங்கையின் அபிவிருத்திக்குத் தேவையான சகல உதவி ஒத்துழைப்புக்களையும் நல்குவதற்கு ஈரான் அரசாங்கம் தயாராக உள்ளது என்றார்.

இப்பேச்சுவார்த்தையில் ஈரானின் முன்னணி சேலைன் உற்பத்திக் கம்பனியின் முகாமையாளரும் கலந்து கொண்டார்.