சரத் பொன்சேகா நவலோக தனியார் மருத்துவமனையில் சிகிச்சைக்காக அனுமதி

முன்னாள் இராணுவத் தளபதி சரத் பொன்சேகா மேலதிக சிகிச்சைக்காக இன்று கொழும்பிலுள்ள நவலோக தனியார் மருத்துவமனையில் அனுமதிக்கப்பட்டுள்ளார்.
நேற்றைய தினம் கொழும்பு உயர்நீதிமன்றத்தில் விசாரணைக்கு எடுத்துக் கொள்ளப்பட்டிருந்த வெள்ளைக் கொடி விவகாரம் தொடர்பான வழக்கில் சாட்சியமளித்துக் கொண்டிருக்கையில் இரண்டு தடவைகள் அவருக்கு கடுமையான இருமல் ஏற்பட்டிருந்தது.

விடுதலைப் புலிகள் தன்னைப் படுகொலை செய்வதற்காக மேற்கொண்ட தற்கொலைக்குண்டுத்தாக்குதலின் போது உடம்பினுள் உட்புகுந்த சில குண்டுத் துகள்கள் இன்னும் தன் உடம்பில் இருப்பதாகவும் அதன் காரணமாகவே தனக்கு சுவாசத்தில் சிரமம் மற்றும் அடிக்கடி இருமல் ஏற்படுவதாகவும் அவர் நீதிமன்றத்தில் விளக்கமளித்தார்.

அதனையடுத்து வழக்கை பிறிதொரு தினத்துக்கு ஒத்தி வைத்த நீதிபதிகள் குழு, சரத் பொன்சேகாவின் தனிப்பட்ட மருத்துவரிடம் அவருக்குச் சிகிச்சை பெற்றுக் கொள்ள அனுமதியளிக்குமாறும் தேவைப்பட்டால் நவலோக மருத்துவமனையில் சிகிச்சைக்காக அவரை அனுமதிக்குமாறும் சிறைச்சாலைகள் ஆணையாளர் நாயகத்துக்கு உத்தரவிட்டிருந்தனர்.

அதன் பிரகாரம் மேலதிக சிகிச்சைகளுக்காக சரத் பொன்சேகா இன்று நவலோக மருத்துவமனையில் அனுமதிக்கப்பட்டுள்ளார்.