அதிமுக சட்டபேரவை தலைவராக, ஜெயலலிதா ஏகமனதாக தெரிவு! - பதவியேற்பு வைபவத்துக்கு தேமுதிகவுக்கும் அழைப்பு?!

அதிமுக பொதுச்செயலாளர் ஜெயலலிதா, அதிமுக சட்டபேரவை தலைவராக இன்று தெரிவு செய்யப்பட்டார். சென்னை ராயப்பேட்டையில் உள்ள அதிமுக கட்சி அலுவலகத்தில், அதிமுக சட்டமன்ற உறுப்பினர்கள் கூட்டம் இன்று நடைபெற்றது.



அவை தலைவர் மதுசூதனன் தலைமையில் நடைபெற்ற அக்கூட்டத்தில் அதிமுக பொதுச்செயலாளர் ஜெயலலிதா புதிய சட்டபேரவை தலைவராக ஏகமனதாக தெரிவு செய்யப்பட்டார். பின்னர் தீர்மான கடிதத்துடன் ஆளுனர் பர்னாலாவை அவர் சந்தித்தார்.



ஆளுநரைச் சந்தித்துவிட்டு வெளியே வந்த ஜெயலலிதாவிடம் செய்தியாளர்கள், பதவியேற்பு விழா குறித்து கேள்வி எழுப்பினர். அதற்கு அவர், தேமுதிக உள்பட அனைத்துக் கட்சிகளையும் பதவியேற்பு விழாவுக்கு அழைக்கவுள்ளதாகத் தெரிவித்தார்.

மேலும், புதிதாக அமையவுள்ள ஆட்சியில், மின்வெட்டு பிரச்னை உள்பட தனக்கு முன் மிகப் பெரிய சவால்கள் உள்ளதாகத் தெரிவித்தார். விரைவில் புதுதில்லி செல்லவுள்ளதாகவும், மேற்கொள்ள வேண்டிய நடவடிக்கைகள் குறித்து மத்தியில் விவாதிக்கவுள்ளதாகவும் தெரிவித்தார்.

இது தொடர்பில் மேலும் தெரியவருவது

புதிய மந்திரி சபை பதவி ஏற்பு விழா சென்னை பல்கலைக்கழக நூற்றாண்டு விழா மண்டபத்தில் நாளை பகல் 12.15 மணிக்கு நடக்கிறது. முதல்- அமைச்சராக ஜெயலலிதா பதவி ஏற்கிறார்.

அவருக்கு கவர்னர் பர்னாலா பதவிப் பிரமாணமும் ரகசிய காப்பு பிரமாணமும் செய்து வைக்கிறார். ஜெயலலிதாவுடன் அமைச்சர்கள் சிலரும் பதவி ஏற்பார்கள்.

அதன் பிறகு புதிய எம்.எல்.ஏ.க்கள் பதவி ஏற்பு நிகழ்ச்சி செயின்ட் ஜார்ஜ் கோட்டையில் நடக்கிறது. மூத்த எம்.எல்.ஏ. ஒருவர் தற்காலிக சபாநாயகராக பொறுப்பு வகித்து புதிய எம்.எல்.ஏ.க்களுக்கு பதவிப் பிரமாணம் செய்து வைப்பார்.

பின்னர் புதிய சபாநாயகர், துணை சபாநாயகர் தேர்தல் நடக்கிறது. புதிய சபாநாயகரை அவை முன்னவரும், எதிர்க்கட்சி தலைவரும் அழைத்துச் சென்று சபாநாயகர் இருக்கையில் அமரவைப்பார்கள். இந்த நிகழ்ச்சிக்கு பிறகு வழக்கமான சட்டசபை கூட்டம் நடைபெறும். இந்த கூட்டத்தில் கவர்னர் பர்னாலா உரை நிகழ்த்துவார்.

இதேவேளை தமிழக முதல்வராக தெரிவு செய்யப்பட்ட ஜெயலலிதாவை, காங்கிரஸ் தலைவி சோனியா காந்தி தேநீர் விருந்துபசாரத்திற்கு அழைத்துள்ளதாக உறுதிப்படாத தகவல்கள் வெளியாகியுள்ளன.